लोकसभेसाठी अमित शहांचा मास्टर प्लान

मटा ऑनलाइन वृत्त । जम्मू

देशातील एकामागोमाग एका राज्यात विजय मिळविणाऱ्या भाजपनं आता २०१९च्या लोकसभा निवडणुकीसाठी कंबर कसली आहे. आगामी लोकसभा निवडणुकीसाठी भाजपचे अध्यक्ष अमित शहा यांनी मास्टर प्लान तयार केला असून भाजपला घराघरात पोहोचविण्यासाठी ६०० पूर्णवेळ कार्यकर्त्यांची फौजच तयार केली आहे. निवडणुकीदरम्यान शहा हे स्वत: प्रत्येक राज्यांमध्ये किमान १५ दिवस तळ ठोकून राहणार आहेत.

लोकसभा निवडणुकीत मतदारसंघाच्या लोकसंख्येनुसार त्या-त्या मतदारसंघात पूर्णवेळ कार्यकर्ते नियुक्त केले जाणार आहेत. तसेच निरीक्षक म्हणून काही लोकांची नियुक्ती केली जाणार आहे. त्याचप्रमाणे, प्रत्येक राज्यातील बुथस्तरावरील तयारीचा आढावा घेण्यासाठी अमित शहा प्रत्येक राज्यात १५ दिवस थांबणार आहेत. लोकसभा मतदारसंघात ६०० पूर्णवेळ कार्यकर्ते तैनात ठेवण्यात येणार आहेत. प्रत्येक लोकसभा मतदारसंघात एक पूर्णवेळ कार्यकर्ता असे ५४३ पूर्णवेळ कार्यकर्ते तैनात करण्यात येणार आहेत. ६०० पैकी इतर उरलेल्या कार्यकर्त्यांना ज्या लोकसभा मतदारसंघात पक्ष कमकुवत असेल तिथे तैनात केले जाणार आहेत. पक्षाच्या साडेतीन लाख कार्यकर्त्यांमधूनच या ६०० पूर्णवेळ कार्यकर्त्यांची निवड केली गेली आहे. यातील ४ हजार कार्यकर्त्यांनी ६ महिन्याचा पूर्णवेळ पक्षाला देण्याचा निर्णय घेतल्याचं सूत्रांनी टाइम्स ऑफ इंडियाला सांगितलं.

अमित शहा यांनी सर्वात आधी गुजरात, ओडिशा, पश्चिम बंगाल, तेलंगणा आणि लक्षद्वीप या पाच राज्यांवर लक्ष केंद्रीत केलं आहे. या पाचही राज्यात बुथस्तरावर पक्षाला मजबूत करण्याचा निर्णय त्यांनी घेतला आहे. या पाच राज्यांत अमित शहा पाच दिवस तळ ठोकून राहणार आहेत. त्यानंतर ११० दिवस ते देशव्यापी दौरा करणार आहेत. या दौऱ्यात १२० मतदारसंघांवर अधिक काम करण्यात येणार आहे, असंही सूत्रांनी सांगितलं.