काश्मीर: फुटिरतावाद्याशी विनाअट चर्चेस तयार

मटा ऑनलाइन वृत्त। नवी दिल्ली

काश्मीरमधील समस्या सोडवण्यासाठी, तसेच काश्मीरमध्ये कायमस्वरूपी शांताता नांदावी यासाठी केंद्र आणि राज्य सरकार फुटिरतावादी, तसेच सर्व संबंधित पक्षांशी विनाअट चर्चा करण्यास तयार आहे अशी भूमिका भाजपचे महासचिव राम माधव यांनी मांडली आहे. राम माधव यांच्या भूमिकेचे सत्ताधारी पीपल्स डेमॉक्रॅटिक पक्षाने स्वागत केले आहे. काश्मीर समस्या सुटावी या दृष्टीने राम माधव यांची भूमिका महत्त्वाची असल्याची प्रतिक्रिया पीडीपीने व्यक्त केली आहे.

केंद्र सरकार फुटिरतावाद्यांशीही चर्चा करण्यास तयार आहे का, या प्रश्नाला उत्तर देताना राम माधव यांनी सकारात्मक प्रतिसाद दिला. काश्मीर प्रश्न सुटावा यासाठी तसेच इथे शांताता प्रस्तापित व्हावी यासाठी जे कुणी तयार आहे त्यांचे स्वागत आहे अशी भूमिका राम माधव यांनी घेतली आहे. हुर्रियतबाबत विचारले असता आम्ही कधीही चर्चेला नकार दिलेला नाही असेही ते पुढे म्हणाले. मात्र जे चर्चेसाठी तयार होत नाहीत अशांना देखील प्रश्न विचारले जायला हवेत असेही ते म्हणाले.

विरोधी पक्षांनी राजकारण न करता जर चर्चेच्या मुद्द्याकडे पाहिले तर काश्मीरचा मुद्दा इथे लवकरच शांतता प्रस्थापित होऊ शकेल असेही ते पुढे म्हणाले.

राम माधव यांच्या भूमिकेचे स्वागत करताना पीडीपीचे उपाध्यक्ष सरताज मदानी म्हणाले की, काश्मीर प्रश्नाबाबत असलेला नकारात्म दृष्टीकोन संपुष्टात आणला पाहिजे. राम माधव यांच्या नव्या प्रस्तावाकडे सकारात्मक दृष्टीने आणि प्रामाणिकपणे पाहण्याची अधिक गरज असल्याचेही ते म्हणाले.