भाजपच्या 'त्या' दयाशंकर यांची 'घरवापसी'

मटा ऑनलाइन वृत्त । लखनऊ

उत्तर प्रदेश विधानसभा निवडणुकीपूर्वी बहूजन समाज पक्षाच्या अध्यक्षा मायावती यांच्याबद्दल आक्षेपार्ह विधान केल्याने भाजपमधून निलंबित करण्यात आलेले भाजपचे प्रदेश उपाध्यक्ष दयाशंकर सिंह यांची पुन्हा 'घरवापसी' झाली आहे. उत्तर प्रदेश विधानसभेचे निकाल जाहीर होताच दयाशंकर सिंह यांना पक्षात सामावून घेण्यात आल्याने आश्चर्य व्यक्त केले जात आहे.

दयाशंकर सिंह यांना पक्षाने सहा वर्षासाठी निलंबित केले होते. त्यानंतर त्यांची पत्नी स्वाती सिंह यांच्याकडे पक्षाच्या महिला विभागाची धुरा देतानाच त्यांना लखनऊच्या सरोजिनीनगर विधानसभा मतदारसंघातून उमेदवारीही दिली होती. स्वाती सिंह या मतदारसंघातून विजयी झाल्या आहेत. त्यामुळे भाजपने निवडणूका संपताच दयाशंकर सिंह यांचे निलंबनमागे घेत त्यांना पक्षात घेतले आहे. मायावतींविरोधात वक्तव्य केल्यानंतर त्याचे संसदेतही पडसाद उमटले होते. पोलीस अटकेच्या भितीने दयाशंकर फरार झाले होते. नंतर त्यांना अटकही करण्यात आली होती.