दिल्लीत भाजपच 'बाहुबली'; आपचा पराभव

मटा ऑनलाइन वृत्त । नवी दिल्ली

दिल्लीतील तीन महानगरपालिकांच्या निवडणुकीत दिल्लीकरांनी आम आदमी पार्टीला पार 'झाडू'न टाकत आणि काँग्रेसला 'हात' दाखवत भाजपचं 'कमळ' फुलवलं आहे. एकूण २७० प्रभागांसाठी झालेल्या निवडणुकीत तब्बल १८५ जागांसह भाजप दणदणीत विजयाकडे कूच करत आहे.

उत्तर दिल्ली महापालिकेतील १०४ जागांपैकी ६६ जागांवर भाजपचा झेंडा फडकताना दिसतो, तर दक्षिण दिल्लीत (१०४ जागा) त्यांनी ७२ जागांवर बाजी मारलीय. पूर्व दिल्लीच्या ६४ जागांमध्ये तब्बल ४७ जागांवर आघाडी घेत भाजपनं विरोधकांना धूळ चारली आहे.

या निकालांनंतर भाजप कार्यकर्त्यांचा जल्लोष सुरू झाला आहे. आपला विजय सुकमा नक्षलवादी हल्ल्यातील शहीद जवानांना अर्पण करत असल्याचं त्यांनी जाहीर केलंय, तर 'आप'नं पराभवाचं खापर ईव्हीएमच्या माथी फोडलंय. त्यावर, २०१५ मध्ये याच ईव्हीएमद्वारे केजरीवाल निवडून आले होते, असा टोला भाजपाध्यक्ष अमित शहा यांनी लगावलाय. काँग्रेसचे दिल्ली प्रदेशाध्यक्ष अजय माकन यांनी पराभवाची जबाबदारी स्वीकारत राजीनामा दिला आहे, मात्र त्याचवेळी ईव्हीएम चौकशीची मागणीही केलीय.

दिल्ली महापालिकांचा निकाल 'आप'साठी मोठा झटका असून अरविंद केजरीवाल यांनी आत्मपरीक्षण करण्याची गरज असल्याचं राजकीय जाणकारांचं म्हणणं आहे.