शाहीन बाग नव्हे, शैतान बाग; भाजप नेता बरळला

नवी दिल्लीः दिल्ली विधानसभा निवडणुकीची रणधुमाळी जोरात सुरू आहे. अवघ्या काही दिवसांनंतर या ठिकाणी मतदान पार पडणार आहे. त्याआधी आम आदमी पार्टी आणि भाजपमध्ये शाब्दिक चकमक सुरू आहे. आरोप-प्रत्यारोपांच्या फैरीत भाजपचे अनेक नेते वादग्रस्त विधान करीत आहेत. भाजपचे राष्ट्रीय सचिव तरुन चुघ यांनी शाहीन बागची तुलना दहशतवादी संघटना इस्लामिक स्टेटसोबत केली आहे. शाहीन बाग म्हणजेच शैतान बाग आहे, असे वादग्रस्त विधान त्यांनी ट्विटरवर केले आहे.

तरुन चुघ यांनी ट्विट करून शाहीन बागवर वादग्रस्त विधान केले आहे. भाजप नेते अनुराग ठाकूर यांच्या गोळी मारण्याचे समर्थनही त्यांनी यावेळी केली. आम्ही दिल्लीला सीरिया बनवू देणार नाही. त्यांना आयएसआयएसच्या धोरणानुसार काम करू देणार नाही. ते मुख्य रस्त्यांना ब्लॉक करून दिल्लीतील लोकांच्या मनात भिती पसरवण्याचे काम करीत आहेत. परंतु, आम्ही असे होऊ देणार नाही. आम्ही दिल्लीला जळू देणार नाही. आणखी एक ट्विट करीत त्यांनी अनुराग ठाकूर यांचे समर्थन केले. देशद्रोह्यांना चुकीचे काम करू देणार नाही. भारताच्या अखंडतेला कोणालाही तोडू देणार नाही. शाहीन बागचा अर्थ हा शैतान बाग असा होता. भारतात हाफिज सईदच्या विचारांना या ठिकाणी थारा लागू देणार नाही, असे त्यांनी म्हटले आहे.

भाजपच्या अनेक नेत्यांनी शाहीन बागवर निशाणा साधला आहे. तुमचे एक मतदान हे नजफगडच्या शाहीन बागसोबत आहे की, भारत मातासोबत आहे, हे सिद्ध करेल, असे केंद्रीय गृहमंत्री अमित शहा यांनी नजफगडच्या रॅलीत विधान केले होते. तर भाजप खासदार परवेश वर्मा यांनी शाहीन बागची तुलना काश्मीरसोबत केली होती. दिल्लीत भाजप सत्तेत आल्यास शाहीन बाग एका तासात रिकामे करू, असे विधान परवेश वर्मा यांनी केले होते.

जगात सर्वाधिक ट्रॅफिक बेंगळुरूत, मुंबई ४थी

शाहीन बागसोबत CM निवास खाली करूः मिश्रा

राजकारणी आत्महत्या का करत नाहीत?: रिचा

CAA आंदोलनांचा धसका! IIT मध्ये भाषणबंदी