भाजपचं गुजरातेत 'मन की बात चाय के साथ'

मटा ऑनलाइन वृत्त । अहमदाबाद

पंतप्रधान नरेंद्र मोदींना 'चाय बेच' म्हणणाऱ्या मीमने हिणवणाऱ्या काँग्रेसला 'चहा'च्याच माध्यमातून तोडीस तोड उत्तर द्यायला भाजप सज्ज झालंय. गुजरातमधील भाजप कार्यकर्ते २६ नोव्हेंबरला चहा पीत पीत पंतप्रधान नरेंद्र मोदींची 'मन की बात' ऐकणार आहेत. 'मन की बात चाय के साथ' कार्यक्रमाच्या निमित्तानं भाजप मतदारसंघांमध्ये लोकांशी संवाद साधणार आहे.

मन की बात कार्यक्रमानंतर दुसऱ्याच दिवसापासून मोदी प्रचारासाठी गुजरातमध्ये जाणार आहेत. भाजपचे गुजरात प्रभारी भूपेंद्र यादव म्हणाले, 'मोदींच्या दौऱ्यापूर्वी भाजप कार्यकर्ते 'मन की बात' कार्यक्रमाच्या माध्यमातून लोकांना जोडण्याचं काम करतील. यासाठीच २६ नोव्हेंबरला सकाळी आम्ही 'मन की बात चाय के साथ' कार्यक्रमाचं आयोजन केलं आहे. आमचे कार्यकर्ते पंतप्रधानांचा कार्यक्रम सर्व ५० हजार मतदान केंद्रांवर ऐकतील आणि सोबत चहादेखील पिणार आहे. लोकांशी थेट संवाद साधण्यासाठी हा कार्यक्रम करण्यात येणार आहे.'

काँग्रेसचं ऑनलाइन मॅगझीन 'युवा देश'ने मोदींचं मीम टि्वट केलं होतं. नंतर त्यावरून वादंग उठताच ते डीलीट करण्यात आलं. काँग्रेसनेही त्याच्याशी असहमती दर्शवली. पण मोदींवरील या विनोदाला भाजप काँग्रेसविरोधातल्या प्रचारासाठी चांगलीच हवा देणार असं सांगण्यात येत आहे. खुद्द मोदीदेखील त्यांच्या प्रचारसभांमध्ये हा मुद्दा मांडण्याची शक्यता वर्तवण्यात येत आहे.