ट्रम्प दौराः काँग्रेसला पोटदुखी का? भाजपचा पलटवार

नवी दिल्लीः अमेरिकेचे अध्यक्ष डोनाल्ड ट्रम्प यांच्या भारत दौऱ्यावरून राजकारण रंगलं आहे. ट्रम्प यांच्या स्वागतासाठी अहमदाबादमधील एका समितीकडून १०० कोटी रुपये खर्च करण्यात येणार आहेत. या खर्चावर काँग्रेसने प्रश्न उपस्थित केलाय. तर जगात भारताची पत वाढतेय. काँग्रेसला पोटदुखी का होतेय? असा प्रतिप्रश्न करत भाजपने काँग्रेसला उत्तर दिलंय. तर झोपडपट्ट्यांसमोरील भिंती रंगवण्यावरून काँग्रेस नेते शशी थरूर यांनी सरकारला टीकेचं लक्ष्य केलंय.

सरकार काय लपवत आहे? प्रियांका गांधींचा सवाल

अमेरिकेचे अध्यक्ष डोनाल्ड ट्रम्प यांच्या स्वागतासाठी १०० कोटी रुपये खर्च होत आहेत. हा खर्च एका समितीमार्फत केला जातोय. पण आपण या समितीचे सदस्या आहोत हे समितीच्या सदस्यांनाच माहीत नाहीए. यामुळे देशाला हे कळायलाच हवं. मंत्रालयाने समितीला किती निधी दिला? समितीच्या नावाखाली सरकार काय लपवतंय?, असा प्रश्न प्रियांका गांधी यांनी ट्विट करून विचारलाय.

काँग्रेसला पोटदुखी का होतेय?

प्रियांका गांधींनी उपस्थित केलेल्या प्रश्नांना भाजपने उत्तर दिलंय. ट्रम्प यांचा दौरा म्हणजे जगातील सर्वांत मोठी लोकशाही आणि एका जुन्या लोकशाहीची भेट आहे. याचा काँग्रेसला आनंद का होत नाहीए? जागतिक पातळीवर भारताची पत वाढते आहे. काँग्रेसला याचा आनंद नाहीए का? भारत-अमेरिका द्वीपक्षीय संबंधांमध्ये ट्रम्प यांचा हा दौरा मैलाचा दगड ठरणार आहे. यामुळे काँग्रेसने चिंता करण्यापेक्षा देशाने कर्तबगारीवर अभिमान केला पाहिजे. संरक्षण आणि व्यापार क्षेत्रात अमेरिकेसोबत जो व्यवहार होणार आहे तो यूपीएच्या काळात झाला नाही. पण काँग्रेस आत्म परीक्षण करण्याऐवजी सवाल करत आहे, असं भाजपचे प्रवक्ते संबित पात्रा म्हणाले. पंतप्रधान नरेंद्र मोदींची आज जागतिक स्तरावर जी प्रतिष्ठ आहे ती काँग्रेसने माजी पंतप्रधान मनमोहन सिंग यांना मिळू दिली असती का? सवाल पात्रा यांनी काँग्रेसला केला.

काय आहे प्रकरण?

ट्रम्प यांच्या दौऱ्यासाठी अहमदाबादमध्ये जोरदार तयारी सुरू आहे. या तयारीवर १०० कोटी रुपये खर्च होत असल्याने प्रश्न उपस्थित केले जात आहे. हा खर्च सरकार देणार आहे की दुसरं कुणी या खर्चाचा बोजा उचलणार आहे? यावर परराष्ट्र मंत्रालयाचे प्रवक्ते रवीशकुमार यांनी गुरूवारी माहिती दिली. हा हायप्रोफाइल पब्लिक इव्हेंट डोनाल्ड ट्रम्प नागरिक अभिनंदन समितीकडून करण्यात येणार आहे, असं ते म्हणाले. पण या खासगी संस्थेबाबत फारशी कुणालाच माहिती नाहीए. म्हणून विरोधकांनीही याच मुद्द्यावरून केंद्रातील मोदी सरकारवर निशाणा साधला आहे. नागरिक अभिनंदन समिती कधी बनली? तिची नोंदणी कधी झाली? या समितीकडे इतका पैसा कुठून आला? असे प्रश्न काँग्रेस नेते आनंद शर्मांनी उपस्थित केले. तर काँग्रेसचे वरिष्ठ नेते शशी थरूर यांनी ट्विट केलंय. भिंती रंगवून सरकारकडून गरीबी झाकण्याचा प्रयत्न होतोय, असं थरूर म्हणालेत.