गुजरात, हिमाचल भाजपकडे!

वृत्तसंस्था, अहमदाबाद/ सिमला

देशातील विधानसभा निवडणुकांत एकापाठोपाठ एक राज्ये पादाक्रांत करणाऱ्या भारतीय जनता पक्षाला सोमवारी, नाताळच्या आधीच गुजरात व हिमाचल प्रदेश निवडणुकांतील विजयाची भेट मिळाली. या पक्षाने गुजरातेत सलग सहावा विजय मिळवला, तर काँग्रेसकडून हिमाचलची सत्ता खेचून घेतली. मात्र, काँग्रेसने दिलेल्या कडव्या लढतीमुळे गुजरातेत सत्ता राखताना भाजपची चांगलीच दमछाक झाली असून, त्यांचे संख्याबळ ११५वरून ९९पर्यंत घसरले आहे. तर ६१वरून ७७ जागांपर्यंतच्या वाढीव बळाच्या रूपाने, काँग्रेसचे अध्यक्षपद नुकतेच हाती घेणारे राहुल गांधी यांनाही नाताळभेट मिळाली आहे.

दोन्ही राज्यांतील ​मतदारांचा कौल मी मान्य करतो. मी निकालामुळे निराश नाही. काँग्रेस कार्यकर्त्यांच्या लढाईचा मला अभिमान वाटतो कारण ही लढाई आक्रमकता विरुद्ध शालीनता अशी होती.

- राहुल गांधी, काँग्रेस अध्यक्ष

दोन राज्यांतील विजय म्हणजे आमच्या सरकारने हाती घेतलेल्या सुधारणांना मतदारांनी दिलेली पोचपावती आहे. मे २०१४मध्ये केंद्रात सत्तांतर झाल्यापासून देशात विकासाभिमुख राजकारणाचे वातावरण निर्माण झाले आहे.

- पंतप्रधान नरेंद्र मोदी