योगींनी घेतली मुख्यमंत्रीपदाची शपथ

मटा ऑनलाइन वृत्त । लखनऊ

उत्तर प्रदेश विधानसभा निवडणुकीत मिळालेल्या विक्रमी बहुमतानंतर भाजपनं मुख्यमंत्रीपदासाठी निवडलेले योगी आदित्यनाथ यांनी आज राज्याचे मुख्यमंत्री म्हणून शपथ घेतली. योगी आदित्यनाथांच्या रूपानं उत्तर प्रदेशसारख्या देशातील सर्वात मोठ्या राज्याच्या मुख्यमंत्रीपदी प्रथमच एका संन्याशाची वर्णी लागली आहे. योगींबरोबरच भाजपचे प्रदेशाध्यक्ष केशव प्रसाद मौर्य आणि डॉ. दिनेश शर्मा यांनी उपमुख्यमंत्रीपदाची शपथ घेतली.

पंतप्रधान नरेंद्र मोदी व भाजपाध्यक्ष अमित शहा यांच्यासह केंद्रीय मंत्री, भाजपशासित राज्यांचे मुख्यमंत्री, ज्येष्ठ नेत्यांसह लाखो नागरिकांच्या उपस्थितीत अडीच वाजण्याच्या सुमारास हा शपथविधी सोहळा पार पडला. यूपीचे राज्यपाल राम नाईक यांनी मुख्यमंत्री व उपमुख्यमंत्र्यांसह अन्य ४७ मंत्र्यांना पद आणि गोपनीयतेची शपथ दिली. मावळते मुख्यमंत्री अखिलेश यादव व समाजवादी पक्षाचे नेते मुलायमसिंह यादव हेही यावेळी व्यासपीठावर उपस्थित होते.

पंतप्रधान मोदी हे समारंभाच्या ठिकाणी येताच मोदी, मोदी अशा घोषणा देणाऱ्या जनसमुदायानं योगी आदित्यनाथ शपथ घेण्यासाठी उठताच योगी, योगी असा गजर केला. भाजपच्या तिकिटावर लखनऊ कँटोन्मेंटमधून निवडून आलेल्या काँग्रेसच्या माजी प्रदेशाध्यक्ष रीटा बहुगुणा यांना तसंच, बसपमधून भाजपमध्ये आलेल्या स्वामी प्रसाद मौर्य यांनाही मंत्रिमंडळात स्थान देण्यात आलं आहे.