वृत्तसंस्था, बालिया
निवडणुकीचा प्रचारधुरळा उडण्यास सुरुवात झाली असून, एकमेकांवर शेरेबाजीही सुरू झाली आहे. या शेरेबाजीची हीन पातळी गाठल्याचे मंगळवारी पाहण्यास मिळाले. भाजपचे बरिया मतदारसंघाचे आमदार सुरेंद्र सिंग यांनी बसप सर्वेसर्वा मायावती यांच्यावर शेरेबाजी केली.
मायावतींच्या केशरचनेवर बोलतानाच त्या दररोज फेशियल करतात, असे सिंग म्हणाले. मायावतींनी पंतप्रधान नरेंद्र मोदी यांच्यावर केलेल्या टीकेला उत्तर देण्यासाठी सुरेंद्र सिंग म्हणाले, जो नेता दररोज फेशियल करतो तोच आमच्या नेत्याला शौकिन म्हणतो आहे. स्वच्छ वस्त्रे परिधान करणे म्हणजे ती व्यक्ती शौकिन होत नाही. मात्र साठाव्या वर्षीही केसांना कलप लावणे हे शौकिन असल्याचे लक्षण आहे, असा टोमणाही सिंग यांनी मारला.
मायावती यांनी एका ट्विटमध्ये म्हटले होते, की '२०१४च्या निवडणुकीत नरेंद्र मोदी यांनी स्वतःला चहावाला म्हटले होते. यंदाच्या निवडणुकीत ते स्वतःला चौकीदार म्हणत आहेत. ज्या व्यक्तीचे राहणीमान विलासी आहे ते साधी राहणी - उच्च विचार याविषयी सांगतात.' मायावतींच्या विधानाला समाजवादी पक्षाचे अध्यक्ष अखिलेश यादव यांनी पाठिंबा दिला आहे.