ममता बॅनर्जी यांचा शिरच्छेद करणाऱ्यास ११ लाख

मटा ऑनलाइव वृत्त । आग्रा

भाजपच्या भारतीय जनता युवा मोर्चानं पश्चिम बंगालच्या मुख्यमंत्री ममता बॅनर्जी यांच्या शिरच्छेदाचा फतवा काढला आहे. ममता बॅनर्जी यांचा शिरच्छेद करणाऱ्यास ११ लाखाचं बक्षिस देणार असल्याची घोषणा युवा मोर्चानं केली आहे.

अलिगडमधील युवा मोर्चाचे माजी मंडल अध्यक्ष योगेश वार्ष्णेय यांनी ही घोषणा केली. 'टाइम्स ऑफ इंडिया'शी बोलताना त्यांनी ही घोषणा केली. पश्चिम बंगालच्या सूरी आणि वीरभूम जिल्ह्यात हनुमान जयंतीच्या मिरवणूकीत 'जय श्री राम'ची घोषणाबाजी करणाऱ्यांविरोधात लाठीचार्ज करण्यात आला. लोकांना प्रचंड मारहाण केली. हे फार वाईट होतं. ज्या लोकांवर लाठीमार करण्यात आला, ते कोणत्याही पक्षाचे नव्हते. ते हनुमानाचे भक्त होते, असे योगेश म्हणाले.

पश्चिम बंगालमध्ये मुस्लिमांचं लांगूलचालन करण्यासाठी हिंदूंना टार्गेट केले जात आहे. मुख्यमंत्र्यांच्या शिरच्छेदासाठी ११ लाखाचं बक्षिस जाहीर करणं हा या घटनेवर नाराजी जाहीर करण्याचा प्रकार असल्याचंही ते म्हणाले. वीरभूम आणि सूरी येथे वीर हनुमान जयंती निमित्त मिरवणूक काढण्यासाठी आयोजकांना कोणतीही परवानगी देण्यात आलेली नव्हती. तरीही मिरवणुकीत सुमारे पाच हजार लोक सहभागी झाली होते. यात बाईकस्वार हातात भगवा झेंडा घेऊन घोषणा देत होते. 'जय श्री राम'ची नारेबाजी सुरू होती. या मिरवणुकीत भाजप किंवा राष्ट्रीय स्वयंसेवक संघाचा एकही नेता सामिल नव्हता.