दहशतविरोधी कारवाईसाठी काश्मिरात ‘ब्लॅक कॅट’?

वृत्तसंस्था, श्रीनगर

जम्मू-काश्मीरमध्ये बुधवारी राज्यपाल राजवट लागू करण्यात आल्याच्या पार्श्वभूमीवर, राज्यात दहशतविरोधी कारवायांसाठी 'नॅशनल सिक्युरिटी गार्ड' म्हणजेच ब्लॅक कॅट कमांडोंना तैनात केले जाण्याची शक्यता आहे. एनएसजीचे एक पथक गेले काही दिवस काश्मीर खोऱ्यात असून श्रीनगर शहराबाहेर कठोर प्रशिक्षण घेत आहे.

एनएसजी कमाडोंना दहशतवादविरोधी कारवायांमध्ये सहभागी करण्याचा निर्णय गृहमंत्रालयाने घेतला होता. राज्याच्या पोलिस दलाच्या मदतीला हे कमांडो सज्ज असतील. दाट लोकवस्तीच्या भागात चकमकींमध्ये घरांमध्ये घुसून कारवाई करताना अनेक सुरक्षा जवान धारातीर्थी पडल्याच्या पार्श्वभूमीवर हा निर्णय घेण्यात आला आहे.

फुटीरतावाद्यांवर धडक कारवाई

राज्यात राज्यपाल राजवट लागू होताच फुटीरतावाद्यांवर धडक कारवाई करण्यास सुरुवात झाली आहे. जम्मू-काश्मीर लिबरेशन फ्रंटचा प्रमुख यासिन मलिकला स्थानबद्ध करण्यात आले, तर हुर्रियत कॉन्फरन्सचा नेता मिरवैझ उमर फारुख याला नजरकैदेत टाकण्यात आले आहे. पत्रकार शुजात बुखारी यांच्या हत्येच्या निषेधार्थ फुटीरतावाद्यांनी गुरुवारी जॉइंट रेझिस्टन्स लीडरशिप (जेआरएल) या नावाने गुरुवारी बंदचे आवाहन केले होते. या पार्श्वभूमीवर ही कारवाई करण्यात आली. हुर्रियतचा कडवा नेता सय्यद अली शाह गिलानी याला यापूर्वीच राहत्या घरीच स्थानबद्ध करण्यात आले आहे.

मलिकला गुरुवारी सकाळी मैझुमा भागातील त्याच्या घरातून ताब्यात घेण्यात आले. त्याला सध्या कोठीबाग पोलिस ठाण्यात ठेवण्यात आले आहे. मिरवैझला निगीन येथील त्याच्या घरीच नजरकैदेत ठेवण्यात आले आहे.