ब्ल्यू व्हेल गेम ही राष्ट्रीय समस्या: सर्वोच्च न्यायालय

मटा ऑनलाइन वृत्त । नवी दिल्ली

लहान मुलांसाठी जीवघेणा ठरलेल्या ब्ल्यू व्हेल गेमवर सर्वोच्च न्यायालयानेही चिंता व्यक्त केली आहे. 'ब्ल्यू व्हेल गेम ही राष्ट्रीय समस्या असून त्याविरोधात तात्काळ पावलं उचलण्याची गरज आहे', असं सर्वोच्च न्यायालयानं स्पष्ट केलं.

ब्ल्यू व्हेल संदर्भात आलेल्या एका याचिकेवरील सुनावणी वेळी न्यायालयाने हे मत व्यक्त केलं. 'दूरदर्शन आणि खाजगी चॅनेलनी ब्ल्यू व्हेल विरोधात मोहीम उघडली पाहिजे. प्राइम टाइम कार्यक्रमावेळी चॅनेलने जागृती करायला हवी', असे निर्देशही न्यायालयाने दिले. तर यावेळी केंद्र सरकारने आपली बाजू मांडताना ब्ल्यू व्हेल गेम प्रकरणी एका समितीची स्थापना करण्यात येईल. त्यानंतर तीन आठवड्यातच न्यायालयासमोर अहवाल सादर करून पुढील कारवाई करू असं स्पष्ट केलं.

ब्ल्यू व्हेल गेममुळे देशात अनेक मुलांना जीव गमवावा लागला होता. खास करून १३ ते १५ वर्ष वयाच्या मुलांमध्ये ब्ल्यू व्हेल गेममुळे आत्महत्येचं प्रमाण अधिक वाढलं होतं. त्यामुळे या गेमवर बंदी आणण्यासाठी तामिळनाडूतील एका ७३ वर्षीय व्यक्तिने सर्वोच्च न्यायालयात याचिका दाखल केली होती. त्यावर न्यायालयाने ही चिंता व्यक्त केली.