सतत पोट दुखत असल्यानं महिला रुग्णालयात पोहोचली; रिपोर्ट पाहून पायाखालची जमीन सरकली

मुझफ्फरपूर: बिहारच्या मुझफ्फरपूरमध्ये एक धक्कादायक घटना घडली आहे. नर्सिंग होममध्ये उपचारांसाठी गेलेल्या महिलेच्या दोन्ही किडणी काढण्यात आल्या. नर्सिंग होममधून घरी परतल्यानंतर पोटदुखी सुरू झाली. पोटदुखी थांबत नसल्यानं महिला सरकारी रुग्णालयात पोहोचली. सुनीता देवी असं या महिलेचं नाव असून १५ सप्टेंबरपासून त्या डायलिसिसवर आहेत.

महिलेच्या दोन्ही किडणी काढण्यात आल्याची माहिती पोलिसांना देण्यात आली. त्यानंतर नर्सिंग होमचा मालक आणि डॉक्टरला पकडण्यासाठी पोलिसांनी तीन विशेष पथकं तयार केली. सध्या पोलीस दोन आरोपींचा शोध घेत आहेत. ही घटना मुझफ्फरपूरच्या बरियारपूर येथे असलेल्या एका नर्सिंग होममध्ये घडली असून संबंधित रुग्णालय नोंदणीकृत नसल्याचं पोलिसांनी सांगितलं. ३ सप्टेंबरला गर्भाशय काढण्यासाठी महिलेवर शस्त्रक्रिया करण्यात आली. त्याचवेळी तिच्या दोन किडणी काढण्यात आल्या.
VIDEO: भीषण दुर्घटना! पूल तोडण्यासाठी बुलडोझर आला; तोडकाम करताना चालकासह कालव्यात कोसळला
गर्भाशय काढल्यानंतर सुनीता देवींच्या पोटात दुखू लागलं. पोटदुखी कमी होत नसल्यानं त्या ७ सप्टेंबरला श्रीकृष्ण मेडिकल कॉलेज रुग्णालयात (एसकेएमसीएच) गेल्या. तिथे डॉक्टरांनी त्यांची तपासणी केली. महिलेच्या दोन्ही किडणी काढण्यात आल्याची माहिती डॉक्टरांनी सुनीता यांच्या कुटुंबीयांना दिली. ते ऐकून कुटुंबाला धक्काच बसला. यानंतर पीडितेच्या कुटुंबानं पोलीस ठाण्यात तक्रार दाखल केली.
पुन्हा एकदा मर्सिडीज कारला अपघात, पण यावेळी वेगळंच घडलं; पाहा VIDEO
शुभकांत क्लिनिकचा मालक पवन कुमार आणि डॉक्टर आर. के. सिंहला पकडण्यासाठी पोलिसांनी तीन पथकं तयार केली आहेत. सध्या पोलीस या दोघांचा शोध घेत आहेत. सुनीता देवी यांच्यावर सध्या उपचार सुरू आहेत. त्या डायलिसिसवर असल्याची माहिती पाटण्याच्या इंदिरा गांधी वैद्यकीय विज्ञान संस्थेच्या नेफ्रोलॉजी आणि किडणी प्रत्यारोपण विभागाचे प्रमुख डॉ. ओम कुमार यांनी दिली. सुनीता देवींची प्रकृती नाजूक आहे. त्यांची उपचारांचा खर्च करण्याचं आश्वासन राज्य सरकारनं दिल्याचं संस्थेचे प्राचार्य डॉ. रणजीत गुहा यांनी सांगितलं.