टीव्ही पाहून योगासने करताना मुलाचा मृत्यू

मटा ऑनलाइन वृत्त । गाझियाबाद

टीव्हीवर पाहून योगासने करताना फास लागून एका १३ वर्षीय मुलाचा मृत्यू झाल्याची दुर्दैवी घटना विजयनगर येथे घडली आहे. सूरज (वय १३) असे मृत मुलाचे नाव आहे.

विजयनगरमधील बागू येथे राहणारे जोखतलाल यांनी दिलेल्या माहितीनुसार, त्यांचा नातू सूरज याला योगासनांची खूप आवड होती. टीव्हीवर लागणारे शो पाहून तो नेहमी वेगवेगळी आसने करत असे. रविवारी त्यांच्या घरी पाहुणे आले होते, जेवण झाल्यानंतर सूरज गच्चीवरील खोलीत गेला आणि नेहमीप्रमाणे टीव्ही पाहून योगासने करू लागला. बराच वेळ झाला तरी त्याचा काही आवाज आला नाही, तो खाली उतरला नाही हे लक्षात आल्याने सर्वजण त्याला शोधत वर गेले. तेव्हा त्याला चादरीचा फास लागल्याचे दिसून आले आणि समोर टीव्हीवर योगासनांचा शो सुरू होता. कुटुंबीयांनी त्याला तातडीने रुग्णालयात दाखल केले, मात्र तेथे डॉक्टरांनी त्याला मृत घोषित केले.

नेहमी रागवायचे कुटुंबीय

टीव्हीवरील शो पाहून योगासने करण्याची सूरजला सवय होती. उंची वाढवण्यासाठी लोंबकाळणे, शीर्षासन करणे अशी अनेक आसने तो करत असे. त्या नादात त्याला अनेकवेळा दुखापतही झाली होती. या मुद्यावरून त्याचे घरचे त्याला अनेकवेळा रागवत असत मात्र तरीही सूरज त्यांचे ऐकत नसे. महत्वाचे म्हणजे रविवारी तो योगासने करायला गच्चीवर जात असतानाही त्याची बहीण त्याला रागावली होती, मात्र त्याने तिचे ऐकले नाही अन् दुर्दैवाने त्याला जीव गमवावा लागला.