'दत्तक ब्राह्मणाला एससी आरक्षणाचा हक्क'

मटा ऑनलाइन वृत्त । नवी दिल्ली

'जन्मानं ब्राह्मण असलेल्या, मात्र कालांतरानं अनुसूचित जातीतील (एससी) कुटुंबानं दत्तक घेतलेल्या व्यक्तीला आरक्षण मिळण्याचा अधिकार आहे,' असा महत्त्वपूर्ण निकाल पंजाब-हरयाणा उच्च न्यायालयानं दिला आहे. 'अशा व्यक्तीला सरकारी नोकरीतील आरक्षण नाकारता येणार नाही,' असं खंडपीठानं स्पष्ट केलं आहे.

पंजाबच्या संगरूर शहरातील एका शिक्षकाच्या याचिकेवर न्यायालयानं हा निकाल दिला. रतेज भारती हे पंजाबमधील एका सरकारी शाळेत शिक्षक होते. एससी कोट्यातून त्यांना ही नोकरी मिळाली होती. मात्र, २० वर्षांच्या सेवेनंतर सरकारनं त्यांना अचानक निलंबित केलं. ब्राह्मण कुटुंबात जन्माला आल्याचं कारण त्यासाठी देण्यात आलं. त्या विरोधात भारती यांनी न्यायालयात धाव घेतली होती.

भारती यांचा जन्म ब्राह्मण कुटुंबात झाला होता. मात्र, त्यांच्या आईच्या मृत्यूनंतर वडिलांनी त्यांना चंद सिंग यांच्याकडं दत्तक म्हणून दिलं. सिंग यांचं कुटुंब अनुसूचित जातीमध्ये मोडतं. याचाच आधार घेऊन भारती यांना नोकरीतून काढण्यात आलं होतं. न्यायालयानं मात्र त्यांना दिलासा दिला आहे. दत्तक देताना संबंधितांनी प्रचलित कायद्याचं व प्रक्रियेचं पालन केलेलं नसलं तरी त्यांना आरक्षण मिळण्याचा अधिकार आहे, असं न्यायालयानं सांगितलं. या निर्णयाचा दूरगामी परिणाम होण्याची शक्यता आहे.