मशिदीसाठी हिंदूनी दिली जमीन, शिखांकडून वर्गणी

बरनाला (पंजाब):

पंजाबमधील बरनाला जिल्ह्यातील मूम गावातील हिंदू आणि शीख समाजबांधवांनी आपल्या कृतीतून सामाजिक एकोप्याचा आदर्श देशासमोर ठेवला आहे. त्यांनी मशिदीसाठी जमीन दान केली आहे, तर शीख समाजबांधवांनी मशीद उभारण्यासाठी लोकवर्गणी गोळा केली आहे.

लुधियानाजवळील मूम गावात मशीद उभारण्यात येत आहे. गावातील मुस्लीम नागरिक येथील बाबा मोमिन शाह दर्ग्यात नमाज पठण करतात. या दर्ग्यात केवळ दोनच खोल्या आहेत. ही बाब लक्षात घेऊन हिंदूंनी गावात मशीद उभारणीसाठी जमीन दान केली. या जागेवर मशिदीचं बांधकाम सुरू करण्यात आलं आहे. त्यांनी केवळ जमीन नाही, तर मशीद उभारण्यासाठी श्रमदानही करत आहेत. त्यांनी लोकवर्गणीही गोळा केली आहे, अशी माहिती ग्रामस्थ नझीम खान यांनी दिली.

गावातील शीख बांधवही मशिदीसाठी वर्गणी गोळा करत आहेत. त्यामुळे पुढील काही महिन्यांतच बांधकाम पूर्ण होईल अशी अपेक्षा आहे, असंही खान यांनी सांगितलं. 'गावात शिवमंदिरही बांधण्यात येत आहे. तसंच येथे गुरुद्वारासुद्धा आहे. त्यामुळं गावात एक मशीदही असावी, असं आम्हाला वाटत होतं. सर्व धर्मांचा सन्मान व्हायला पाहिजे. धर्मनिरपेक्ष असल्याचा आम्हाला अभिमान आहे,' असं पुरुषोत्तम लाल यांनी सांगितलं. या गावात शीख समाजाचे जवळपास चार हजार नागरिक राहतात. तर मुस्लीम आणि हिंदूंची लोकसंख्या ४०० च्या आसपास आहे. हे गाव सामाजिक एकतेचा आदर्श आहे, असं सरपंच मनजीत कौर म्हणाले.