कर्नलच्या पत्नीशी लफडं, ब्रिगेडियरवर कारवाई

मटा ऑनलाइन वृत्त । नवी दिल्ली

लष्करातील कर्नलच्या पत्नीशी प्रेमप्रकरण करणं एका ब्रिगेडियरला भोवलं आहे. या ब्रिगेडियरचे कोर्ट मार्शल करून त्याला शिक्षा म्हणून त्याची सेवाज्येष्ठता १० वर्षानं कमी करण्यात आली असून त्याला पदोन्नती नाकारण्यात आली आहे.

या ब्रिगेडियरला दिलेल्या शिक्षेमुळे त्याला आता लष्करात मेजर जनरल पदाची पदोन्नती कधीच मिळणार नाही. मात्र त्याची नोकरी कायम राहील. तो जोपर्यंत लष्कराच्या सेवेत आहे, तोपर्यंत तो ब्रिगेडियर या पदावरच राहणार असल्याचं सुत्रांनी सांगितलं.

गोडगोड बोलून सहकारी अधिकाऱ्याच्या पत्नीला शारिरीक संबंध ठेवण्यासाठी प्रवृत्त करणं लष्करात गंभीर गुन्हा मानला जातो. अशावेळी दोषी अधिकाऱ्याची पेन्शन न देता लष्करातून हकालपट्टी केली जाते. या अधिकाऱ्याने त्याच्या कृत्याबद्दल पश्चात्ताप व्यक्त केला होता म्हणून त्याला खूपच कमी शिक्षा ठोठावण्यात आली आहे, असं एका अधिकाऱ्यानं सांगितलं.

या ब्रिगेडियरवर एकूण १३ आरोप ठेवण्यात आले आहेत. त्यात दस्ताऐवजांमध्ये गडबड करणं, नियम आणि लष्कराच्या शिस्तीचं उल्लंघन करण्याचा समावेश आहे. गेल्या काही वर्षात लष्करातील अनेक सेक्स स्कँडल उघड झाले आहेत. हवाई दलातील एका पायलटवर वरिष्ठ अधिकाऱ्याच्या पत्नीशी अफेयर केल्याचा आरोप ठेवण्यात आला होता. तर मुंबईतील नौदलाच्या दोन अधिकाऱ्यांनाही अशाच प्रकारणात निलंबित करण्यात आले होते. त्यातील एकावर विवाह बाह्य संबंध ठेवल्याचा तर दुसऱ्यावर महिलांना अश्लिल मेसेज पाठविल्याचा आरोप ठेवण्यात आला होता.