bjp manifesto: लॅपटॉप, मोबाईल, मंगळसूत्र देणार

बंगळुरू: कर्नाटक विधानसभा निवडणुकीच्या अंतिम टप्प्यात भाजपने आज जारी केलेल्या जाहीरनाम्यातून आश्वासनांची खैरात करून मतदारांना आपल्याकडे आकर्षित करण्याचा प्रयत्न केला आहे. कर्नाटकातील जनेतेला मोफत मोबाईल, लॅपटॉप देण्यात येणार असून महिलांना मंगळसूत्र देण्याचं आश्वासन या जाहीरनाम्यातून देण्यात आलं आहे. शिवाय शेतकऱ्यांचं एक लाखांपर्यंतचं कर्जमाफ करण्याची घोषणाही भाजपनं केली आहे.

केंद्रीय मनुष्यबळ विकास मंत्री प्रकाश जावडेकर आणि भाजपचे कर्नाटकमधील मुख्यमंत्रीपदाचे उमेदवार बी. एस. येडियुरप्पा यांनी हा निवडणूक जाहीरनामा जाहीर केला आहे. या जाहीरनाम्यातून शेतकरीवर्ग आणि शेतीशी निगडीत उद्योगांना विशेष सवलती देण्यावर जोर देण्यात आला आहे. काँग्रेसच्याही पुढे एक पाऊल टाकत भाजपनं दारिद्रय रेषेखालील कुटुंबांना स्मार्ट फोन आणि कॉलेजमध्ये जाणाऱ्या विद्यार्थांना लॅपटॉप देण्यात येणार असल्याचं जाहीर केलं आहे. येत्या १२ मे रोजी कर्नाटकात मतदान होणार असून १५ मे रोजी निवडणूक निकाल जाहीर होणार आहेत.

भाजपचा जाहीरनामा...

>> गोहत्या रोखण्यासाटी विशेष कार्यक्रम राबवणार

>> महिलांना एक टक्का व्याजानं दोन लाखांपर्यंतचं कर्ज देणार

>> बीपीएलखालील कुटुंबातील सर्व महिलांना मोफत स्मार्ट फोन देणार

>> दारिद्रय रेषेखालील मुलींच्या विवाहात त्यांना ३ ग्रॅमचं मंगळसूत्र देणार

>> ३०० हून अधिक अन्नपूर्णा कँटीन सुरू करणार

>> ओबीसींच्या घरांसाठी ७५०० कोटींची तरतूद

>> महिला आणि मुलींच्या सुरक्षेसाठी राज्यात सीसीटीव्ही कॅमेरे लावणार

>> काँग्रेसच्या कारभाराची श्वेतपत्रिका काढणार

>> सर्व विद्यार्थ्यांना पदवीपर्यंत मोफत शिक्षण देणार