@sushrimayawati: मायावती अखेर ट्विटरवर

लखनऊ:

जगाची कवाडं खुली करणाऱ्या सोशल मीडियापासून आजपर्यंत स्वत:ला आणि पक्षालाही दूर ठेवणाऱ्या बहुजन समाज पक्षाच्या नेत्या मायावतींचं अखेर मतपरिवर्तन झालं आहे. मायावती सोशल मीडियावर सक्रिय झाल्या असून त्यांनी आपल्या अधिकृत ट्विटर अकाउंटवरून पहिलं ट्विटही केलं आहे.

२०१४च्या मोदी लाटेत राजकीय अस्तित्व गमावून बसलेल्या मायावती यांनी आगामी निवडणुकीची जोमानं तयारी सुरू केली आहे. सोशल मीडिया हा निवडणूक प्रचारात महत्त्वाची भूमिका बजावतो याची जाणीवही त्यांना झाली आहे. त्यामुळंच त्यांनी ट्विटरवर सक्रिय होण्याचा निर्णय घेतल्याचं बोललं जातं.

खरंतर, मायावती यांनी ऑक्टोबर २०१८ मध्येच ट्विटरवर अकाउंट सुरू केलं होतं. मात्र, काही दिवसांपूर्वीपर्यंत त्यावर एकही ट्विट नव्हतं. त्यामुळं त्या अकाउंटला काही अर्थ नव्हता. बसपच्या समर्थकांमध्येही त्यामुळं संभ्रम होता. हा संभ्रम दूर करत अखेर २२ जानेवारी रोजी मायावती यांनी पहिलं ट्विट केलं. 'नमस्कार बंधू आणि भगिनींनो, आपल्या सर्वांच्या साक्षीनं ट्विटरच्या जगात पाऊल ठेवतेय. हे माझं पहिलं ट्विट आहे. @sushrimayawati हे माझं अधिकृत अकाउंट आहे. भविष्यात या माध्यमातून आपल्या संपर्कात राहीन. धन्यवाद!'' असं मायावतींनी पहिल्या ट्विटमध्ये म्हटलं आहे.
आजच मायावतींचं ट्विटर अकाउंट व्हेरिफाइड झालं असून त्यावर ब्लू टिक आली आहे. बहुजन समाज पक्षानं एका पत्रकाद्वारे ही माहिती दिली आहे. अकाउंट व्हेरिफाइड झाल्यानंतर मायावतींच्या फॉलोअर्समध्ये वेगानं वाढ होत आहे. आतापर्यंत ७५०० हजारांहून अधिक लोकांनी त्यांना फॉलो केलं आहे.