बिल्डरचे पैसे थकवले; सोनियांविरोधात FIR

मटा ऑनलाइन वृत्त । तिरुवअनंतपुरम

राजकीय आखाड्यात चहूकडून पराभवाचे धक्के बसत असतानाच काँग्रेस अध्यक्षा सोनिया गांधी एका नव्या प्रकरणामुळं गोत्यात आल्या आहेत. केरळमधील राजीव गांधी इन्स्टिट्यूट ऑफ डेव्हलपमेंट स्टडीजच्या इमारतीच्या बांधकामाची देणी थकवल्याबद्दल संबंधित कंत्राटदारानं सोनियांसह काँग्रेसच्या अन्य तीन नेत्यांविरोधात एफआयआर दाखल केला आहे.

मेसर्स हिथर कंस्ट्रक्शन या कंपनीनं हा एफआयआर दाखल केला आहे. 'केरळ काँग्रेसनं तिरुवअनंतपुरम येथे इन्स्टिट्यूट बनविण्यासाठी या कंपनीला कंत्राट दिलं होतं. इन्स्टिट्यूटचं काम पूर्ण होऊन आणि त्याचं उद्घाटन होऊन तीन वर्षे लोटली. पण त्या कामाचा थकीत मोबदला कंपनीला अजूनही दिला गेला नाही. या प्रकरणी हिथर कन्स्ट्रक्शननं विधानसभा निवडणुकीच्या आधीच काँग्रेसला कायदेशीवर नोटीस पाठवून २ कोटी ८० लाख रुपयांची थकीत देणी भागवण्याची मागणी केली होती. त्यासाठी १५ दिवसांची मुदतही दिली होती. मात्र, काँग्रेसकडून कोणतंही उत्तर आलं नाही. त्यामुळं कंपनीनं पोलिसांत धाव घेत एफआयआर दाखल केली आहे. सोनियांबरोबरच इन्स्टिट्यूटचे अध्यक्ष रमेश चेन्नीथला, केरळचे माजी मुख्यमंत्री ओमन चंडी आणि केरळ काँग्रेस प्रदेश समितीचे अध्यक्ष व्ही. एम. सुधीरन यांनाही यात आरोपी करण्यात आलं आहे.

काँग्रेसचे माजी प्रदेशाध्यक्ष असलेले चेन्नीथला यांच्या कार्यकाळात इन्स्टिट्यूटचं कंत्राट देण्यात आलं होतं. मात्र आताच्या अध्यक्षांनी हात वर केले आहेत. पक्षाकडं पुरेसा निधी नाही आणि इन्स्टिट्यूटचीही गरज नाही, असं त्यांचं म्हणणं आहे. सोनिया गांधी यांचं नाव एफआयआरमध्ये असल्यानं या प्रकरणाला महत्त्व आलं आहे.