बस नदीत पडून ३३ जणांचा मृत्यू

जयपूर : राजस्थानातील सवाई माधोपूर जिल्ह्यातील डुबी बनास गावाजवळ एक प्रवासी बस पुलावरून नदीत पडून चालकासह ३३ जणांचा मृत्यू झाला. मृतांमध्ये सात महिला आणि चार मुलांचा समावेश आहे. सात जण जखमी झाले.

ही बस ४५ प्रवाशांसह सवाई माधोपूरहून लासोतच्या दिशेने जात होती. पहाटे सूरवाल पोलिस ठाण्याच्या हद्दीत बनास नदीवरील पुलावर चालकाचा ताबा सुटल्यामुळे ती १०० फूट खोल नदीत कोसळली. यामध्ये ३३ जणांचा मृत्यू झाला, तर सात जण जखमी झाले. जखमींना रुग्णालयात दाखल करण्यात आले असून, त्यांच्यावर उपचार सुरू आहेत. १९ मृतदेह नदीतून बाहेर काढले असून, उत्तरीय तपासणीनंतर ते नातेवाईकांकडे सोपवण्यात आले आहेत.