केंद्रात जेडीयूला शिवसेनेपेक्षा जास्त मंत्रिपदे?

मटा ऑनलाइन वृत्त । नवी दिल्ली

भाजपच्या नेतृत्वाखालील राष्ट्रीय लोकशाही आघाडीत पुन्हा समाविष्ट झालेले बिहारचे मुख्यमंत्री नितीश कुमार यांच्या संयुक्त जनता दलावर (जेडीयू) भाजपची भलतीच मेहरबानी झालेली दिसतेय. पुढिल महिन्यात होणाऱ्या केंद्रीय मंत्रिमंडळाच्या विस्तारात जेडीयूला सामावून घेण्यात येणार असून त्यांना सर्वात जुना मित्रपक्ष असलेल्या शिवसेनेपेक्षा जास्त मंत्रिपदे देण्यात येणार असल्याचं सुत्रांनी सांगितलं.

नितीश कुमार यांनी लालू प्रसाद यादव यांच्या राष्ट्रीय जनता दलाशी काडीमोड घेत भाजपच्या मदतीने बिहारमध्ये सत्ता स्थापन केली आहे. नितीश कुमार यांनी घेतलेल्या या निर्णयाचं पंतप्रधान नरेंद्र मोदी यांनीही स्वागत केलं आहे. सुत्रांनी दिलेल्या माहितीनुसार, पंतप्रधान नरेंद्र मोदी पुढील महिन्यात केंद्रीय मंत्रिमंडळाचा विस्तार करणार असून जेडीयूला केंद्रातील सत्तेत सामावून घेणार आहेत. जेडीयूला एक केंद्रीय मंत्रिपद आणि एक स्वतंत्र प्रभार असलेलं राज्यमंत्रिपद देण्यात येणार असल्याचं सांगण्यात येतं. एनडीएला मजबूत करण्यासाठी आणि राज्यसभेतील भाजपची संख्याबळाची बेगमी वाढविण्यासाठीच जेडीयूला केंद्रातील सत्तेत वाटा देण्याचा भाजपने निर्णय घेतल्याचं सुत्रांनी सांगितलं.

दरम्यान, शिवसेनेचे लोकसभेत १८ आणि राज्यसभेत ३ खासदार आहेत. तर जेडीयूचे लोकसभेत २ आणि राज्यसभेत १० खासदार आहेत. शिवसेनेपेक्षाही कमी खासदार असताना जेडीयूला शिवसेनेपेक्षा एक मंत्रिपद जास्त मिळण्याचे संकेत मिळत आहेत. दरम्यान, जेडीयूला दोन मंत्रिपदं आणि शिवसेनेच्या वाट्याला एक मंत्रिपद ही रचना शिवसेना मान्य करणार की त्याला विरोध करणार याकडे राजकीय निरीक्षकांचे लक्ष लागले आहे.