car accident : दोन ट्रकमध्ये दबली गेली SUV, ८ जणांचा जागीच मृत्यू

बहादूरगढः दिल्लीला लागून असलेल्या बहादूरगढमध्ये KMP एक्सप्रेस-वेवर शुक्रवारी पहाटे भीषण अपघात झाला. बादली गावाजवळ एक SUV कार ओव्हरटेक करत असताना दोन ट्रकच्यामध्ये दबली गेली. या भीषण अपघातात ८ जणांचा मृत्यू झाला आहे. मृतांमध्ये ४ पुरुष, ३ महिला आणि १ लहान मुलाचा समावेश आहे. या अपघातात एक लहान मुलगी जखमी झाली आहे. अपघातात मृत्यू झालेले सर्वजण हे उत्तर प्रदेशातील फिरोजाबाद जिल्ह्यातील नगला अनूप गावातील होते. सर्वजण एकाच कुटुंबातले होते. गोगा मेडी येथून ते परतत होते. पहाटे ४ वाजेच्या सुमारास हा अपघात झाला.

दोन ट्रकमध्ये दबली गेली कार

हा अपघात बादली आणि फरुखनगरदरम्यान झाला. ही कार भाड्याने घेतली होती. या कारमध्ये एकूण ११ जण होते. हे सर्वजण गुरुग्रामला निघाले होते. ओवर टेक करत असताना दोन ट्रकमध्ये कार सापडली आणि ती दबली गेली. पुढे असलेला ट्रक आणि मागच्या ट्रमध्ये ही कार सापडली. यात ८ जणांचा जागीच मृत्यू झाला. या अपघातात कारमधील एका लहान मुलीच्या पायाला गंभीर दुखापत झाली आहे.

रस्त्यावरून जाणाऱ्यांनी पोलिसांना दिली माहिती

अपघात पाहून रस्त्यावरून जाणाऱ्यांनी पोलिसांना त्वरीत माहिती दिली. अपघात होताच जखमींना तातडीने बाहेर काढण्यात आलं. पण तोपर्यंत त्यांचा मृत्यू झाला होता. तर लहान मुलीचा श्वास सुरू होता. तिला लगेच बहादूरगढच्या हॉस्पिटलमध्ये दाखल करण्यात आलं. माहिती मिळताच पोलीस घटनास्थळी दाखल झाले.