नोटाबंदीविरोधात RSS नेत्याचे बंड

मटा ऑनलाइन वृत्त । तिरुवनंतपुरम

नोटाबंदीच्या निर्णयाविरोधात सगळे प्रमुख विरोधी पक्ष रस्त्यावर उतरले असताना भाजप तसेच संघपरिवारातही या निर्णयाविरोधात सुप्त खदखद आहे. याच नाराजीतून केरळमध्ये ४० वर्षे निष्ठेने काम करणाऱ्या राष्ट्रीय स्वयंसेवक संघाच्या एका नेत्याने संघाला रामराम करून कम्युनिस्ट पक्षाचा झेंडा खांद्यावर घेतला आहे.

'हिंदू ऐक्य वेदी'चे राज्य सरचिटणीस राहिलेल्या पी. पद्मकुमार यांनी कम्युनिस्ट पक्षात प्रवेश करताना नोटाबंदीच्या निर्णयावर टीकास्त्र सोडले आहे. ५०० आणि १००० रुपयाच्या नोटांवर बंदी घालण्यात आल्याने सामान्य लोकांना मोठा मनस्ताप सहन करावा लागत आहे. या निर्णयानंतरच आरएसएस सोडण्याचा माझा निर्णय पक्का झाला, अशी प्रतिक्रिया पद्मकुमार यांनी दिली.

भाजप आणि आरएसएसच्या कार्यपद्धतीवरही पद्मकुमार यांनी जोरदार हल्ला चढवला. भाजप आणि संघाचं खुनशी राजकारण तसेच अमानुष वागणूक यांमुळे अनेक कुटुंबं आधार गमावून बसली आहेत, असा गंभीर आरोप त्यांनी केला.