नीरव मोदीवर २८० कोटींच्या फसवणुकीचा गुन्हा

नवी दिल्ली, वृत्तसंस्था

केंद्रीय अन्वेषण विभागाने (सीबीआय) कोट्यधीश हिरे व्यापारी नीरव मोदी, त्याचा भाऊ नशील, पत्नी अमी आणि पंजाब नॅशनल बँकेच्या काही अधिकाऱ्यांविरोधात २८०.७० कोटींच्या फसवणुकीचा गुन्हा दाखल केला आहे. ही फसवणूक २०१७मध्ये झाली होती.

पंजाब नॅशनल बॅँकेने १६ जानेवारी २०१८ रोजी आर्थिक नुकसान झाल्याची तक्रार केल्यानंतर सीबीआयने नीरव मोदी, त्याचा भाऊ नशील, पत्नी अमी, मेहुल चिनूभाई चोसकी या आर यूएस डायमंड, सोलार एक्स्पोर्ट, स्टेलर डायमंड या कंपन्याचे भागीदार आणि बॅँकेच्या अधिकाऱ्यांविरुद्ध गुन्हे दाखल केले आहेत. याबाबत संबधित कपन्यांकडून कोणतीही प्रतिक्रिया मिळू शकली नाही.

सीबीआयने फौजदारी कट रचणे, फसवणूक करणे आणि भ्रष्टाचाराविरुद्धच्या विविध कलमांखाली गुन्हे दाखल केले आहेत. बॅँकेचे निवृत्त उपव्यवस्थापक गोकुलनाथ शेट्टी आणि मनोज खरात यांनी कागदपत्रांची पडताळणी न करता संगनमताने फसवणूक केल्याचे म्हटले आहे असून, त्यांच्यावरही गुन्हे दाखल करण्यात आले आहेत.