फारूख अब्दुल्लांविरुद्ध आरोपपत्र

नवी दिल्ली : जम्मू-काश्मीर क्रिकेट असोसिएशनमध्ये गैरव्यवहार केल्याप्रकरणी केंद्रीय गुन्हे अन्वेषण खात्याने (सीबीआय) सोमवारी जम्मू-काश्मीरचे माजी मुख्यमंत्री फारूख अब्दुल्ला आणि अन्य तीन जणांविरुद्ध श्रीनगर येथील विशेष न्यायालयात आरोपपत्र दाखल केले.
अब्दुल्ला हे असोसिएशनचे अध्यक्ष असताना त्यांनी तत्कालीन सरचिटणीस महंमद सलीम खान, तत्कालीन खजिनदार एहसान अहमद मिर्झा आणि जम्मू-काश्मीर बँकेचे अधिकारी बशीर अहमद मिसगार यांच्या मदतीने गैरव्यवहार केल्याचा आरोप आहे. भारतीय क्रिकेट नियामक मंडळाने जम्मू-काश्मीरमध्ये क्रिकेटच्या विकासासाठी ११२ कोटी रुपये असोसिएशनला दिले होते. त्यातील ४३ कोटी ६९ लाख रुपयांचा या तिघांनी गैरव्यवहार केल्याचा आरोप त्यांच्यावर ठेवण्यात आला आहे.