५० जिल्ह्यांसाठी केंद्राची पथके
भेटी देऊन जिल्हे आणि शहरांमध्ये करोना रोखण्याच्या उपाययोजना, सक्षम उपचार, वैद्यकीय व्यवस्थापनास हातभार लावत आहेत.
करोनारुग्णांची संख्या २ लाख ६६ हजार ५९८
देशभरात गेल्या २४ तासांत विक्रमी ९ हजार ९८७ रुग्णांची भर पडून एकूण करोनारुग्णांची संख्या २ लाख ६६ हजार ६११ वर पोहोचली आहे. सध्या देशभरात उपचार घेत असलेल्या करोनारुग्णांची संख्या १ लाख २९ हजार ९१७ इतकी आहे. आत्तापर्यंत १ लाख २९ हजार ३१३ करोनारुग्ण बरे होऊन घरी परतले आहेत. गेल्या २४ तासांत ५ हजार १२० रुग्ण बरे झाले. दुसरीकडे २४ तासांत ३३१ मृत्यूंची नोंद होऊन एकूण मृतांचा आकडा ७ हजार ४७१ इतका झाला आहे. बरे होणाऱ्या रुग्णांची टक्केवारी ४८.४९ इतकी आहे. आत्तापर्यंत ४९ लाख जणांच्या चाचण्या करण्यात आल्या. सरकारी ५५३ आणि खासगी २३१ अशा ७८४ प्रयोगशाळांमध्ये गेल्या २४ तासांत १ लाख ४१ हजार ६८२ जणांच्या करोना चाचण्या झाल्या आहेत.
मंत्रीगटाची सोळावी बैठक
केंद्रीय आरोग्य मंत्री डॉ. हर्ष वर्धन यांच्या अध्यक्षतेखाली मंगळवारी व्हिडीओ कॉन्फरन्सिंगच्या माध्यमातून मंत्रिगटाच्या १६ व्या उच्चस्तरीय बैठकीत देशभरातील करोना संक्रमणाचा आढावा घेण्यात आला. या बैठकीत नागरी उड्डाण मंत्री हरदीप पुरी, परराष्ट्र मंत्री एस. जयशंकर, गृह राज्यमंत्री नित्यानंद राय, जलवाहतूक मंत्री मनसुख मंडाविया, चीफ ऑफ डिफेन्स स्टाफ बिपीन रावत, राज्यमंत्री अश्विनीकुमार चौबे आदी उपस्थित होते. करोना नियंत्रणाची रणनीती आणि व्यवस्थापनावर या बैठकीत सखोल चर्चा झाली.
देशात आता करोनावरील उपचारांसाठी १ लाख ६७ हजार ८८३ खाटांची सोय असलेली ९५८ समर्पित इस्पितळे उभारण्यात आली असून त्यात २१ हजार ६१४ आयसीयू कक्ष आणि ७३ हजार ४६९ प्राणवायू पुरवठा असलेल्या खाटांचा समावेश आहे. १ लाख ३३ हजार ३७ खाटांची सोय असलेली २,३१३ करोना आरोग्य केंद्रे सज्ज करण्यात आली आहेत. त्यात १० हजार ७४८ आयसोलेशनच्या खाटा आणि ४६ हजार ६३५ प्राणवायू पुरवठा असलेल्या खाटांचाही समावेश आहे. ७ लाख १० हजार ६४२ खाटांची सोय असलेल्या ७,५२५ करोना शुश्रुषा केंद्रांची उभारणी करण्यात आली आहे. आजच्या घडीला देशात २१ हजार ४९४ व्हेंटिलेटर्स उपलब्ध आहेत. केंद्राने आत्तापर्यंत राज्ये आणि केंद्रशासित प्रदेशांना १२८ लाख ४८ हजार एन-९५ मास्क तसेच १०४ लाख ७४ हजार पीपीई किट पुरविल्याची माहिती या बैठकीत देण्यात आली. केंद्राने ६० हजार ८४८ व्हेंटिलेटर्सच्या खरेदीचे आदेश दिले आहेत.