​ ‘सीव्हीसी’ करणार खासगी बँकांचीही चौकशी

नवी दिल्ली : केंद्र सरकारी कर्मचा‍ऱ्यांचा तसेच सार्वजनिक क्षेत्रातील भ्रष्टाचार रोखण्यासाठी कार्यरत असलेला केंद्रीय दक्षता आयोग (सीव्हीसी) आता भ्रष्टाचारप्रकरणी खासगी बँका व त्यांच्या कर्मचा‍ऱ्यांचीही चौकशी करू शकणार आहे. रिझर्व्ह बँकेने या संदर्भातील तरतुदींना नुकतीच मंजुरी दिली असल्याचे दक्षता आयुक्त टी. एम. भसीन यांनी सांगितले.

सर्वोच्च न्यायालयाने गेल्या वर्षी दिलेल्या एका निकालानुसार ‘सीव्हीसी’ला हा अधिकार मिळाला आहे. भ्रष्टाचार प्रतिबंधक कायदा, १९८८ अंतर्गत कोणत्याही खासगी बँकेचे अध्यक्ष, व्यवस्थापकीय संचालक आणि अन्य अधिका‍री व कर्मचारी सरकारी नोकरच आहेत, असे सर्वोच्च न्यायालयाने म्हटले होते. या निकालानुसार, खासगी बँका आणि त्यांच्या व्यवस्थापकीय अधिका‍ऱ्यांसह कर्मचा‍ऱ्यांच्याही भ्रष्टाचाराची चौकशी सीव्हीसी करू शकते.