सिमसाठी आधार गरजेचं; केंद्राची SCमध्ये माहिती

नवी दिल्ली:

आधार व्हेरिफिकेशननंतर मोबाइल ग्राहकांना सिम जारी करण्यात यावं, अशी अट केंद्र सरकार दूरसंचार कंपन्यांना घालू शकतं, अशी माहिती अॅटर्नी जनरल के. के. वेणुगोपाल यांनी गुरुवारी सर्वोच्च न्यायालयात दिली. सिम कार्ड जारी करण्यासाठी आधार कार्ड सक्ती न करण्याचा दूरसंचार कंपन्यांना अलिकडेच दिलेला आदेश तात्पुरत्या स्वरुपात उचललेले पाऊल होते, असंही त्यांनी स्पष्ट केलं.

मोबाईल ग्राहकांनी देशहितासाठी आपल्या सिम कार्डची पुनर्पडताळणी करणं गरजेचं आहे, असा निर्णय न्यायालयानं लोकनिती फाउंडेशनच्या याचिकेवर सुनावणी करताना दिला होता. मात्र, सिमकार्ड-आधार जोडणी अनिवार्य करण्याचा निर्णय कधीच दिला नव्हता, असं न्यायालयानं स्पष्ट केलं होतं. मात्र, आता अॅटर्नी जनरल वेणुगोपाल यांनी हा मुद्दा पुन्हा न्यायालयात उपस्थित केला. वेणुगोपाल म्हणाले की, ''न्यायालयाच्या म्हणण्यानुसारच केंद्र सरकारनं हे पाऊल उचललं होतं आणि सर्व सिम कार्डांची पडताळणी आधारद्वारेच व्हायला हवी, असा त्याचा अर्थ काढण्यात आला होता. याशिवाय ही प्रक्रिया वर्षभरात पूर्ण करण्यात यावी, असं केंद्राला सांगण्यात आलं होतं.''