तिहेरी तलाकवर बंदीसाठी सरकार करणार कायदा

मटा ऑनलाइन वृत्त । नवी दिल्ली

तोंडी (तिहेरी) तलाकवर बंदी आणण्यासाठी केंद्र सरकार कायदा करण्याचा विचार करत आहे. हिवाळी अधिवेशनात तोंडी तलाकला आळा घालणारं विधेयक संसदेत मांडले जाण्याची शक्यता एएनआय वृत्त एजन्सीने वर्तवली आहे. तोंडी तलाकला सर्वोच्च न्यायालयाने सहा महिन्यांची स्थगिती देत कायदा करण्याचे निर्देश सरकारला दिले होते.

सर्वोच्च न्यायालयाने ऑगस्ट महिन्यात तोंडी तलाकवर स्थगिती आणत सरकारला कायदा करण्याचे निर्देश दिले होते. तोंडी तलाक धार्मिक प्रक्रिया असल्याने न्यायालय त्यात दखल देणार नसल्याचे तत्कालीन मुख्य न्या. जे. एस. खेहर आणि न्या. एस. अब्दुल नाझीर यांनी अल्पमतात दिलेल्या निर्णयात म्हटले होते. मात्र सरकारने याप्रकरणी दखल घेऊन तोंडी तलाकला आळा घालण्यासाठी कायदा करायला हवा, असे दोन्ही न्यायमूर्तींचे म्हणणे होते. तोंडी तलाक प्रक्रियेला सहा महिन्यांची स्थगिती देण्यात आली होती. या कालावधीत केंद्र सरकारने कायदा करावा. सहा महिन्यांत कायदा तयार करण्यात आला नाही तर स्थगिती कायम राहील. सर्व पक्षांनी राजकारण बाजूला ठेवून याप्रकरणी निर्णय घ्यावा असे न्यायालयाने सुनावणीच्या वेळी म्हटले होते. Centre likely to introduce a bill in the winter session of the Parliament to end #TripleTalaq pic.twitter.com/2SaAOlB720 — ANI (@ANI) November 21, 2017