covid vaccine : भाजप नेत्याला करोना लसीचे ५ डोस दिले आणि ६ वा दिला जाणार!

मेरठः करोनावरील लसीकरण मोहीमेत आता एक वेगळीच घटना समोर आली आहे. आपल्या लसीकरण प्रमाणपत्रात ( Vaccination Certificate ) घोळ आहे. आपल्याला करोना व्हायरसवरील लसीचे ५ डोस देण्यात आले आहेत आणि ६ वा डोस दिला जाणार आहे, असं प्रमाणपत्रात म्हटल्याचा दावा भाजपच्या एका स्थानिक नेत्याने केला आहे. यामुळे प्रशासन अडचणीत आलं आहे.

पण या घटनेमागे गैरप्रकार आणि कटाची शक्यता आहे, असं आरोग्य अधिकाऱ्यांनी सांगितलं. रामपाल सिंह हे ७३ वर्षांचे आहे. बूथ क्रमांक ७९ चे ते भाजपचे प्रमुख आणि हिंदू युवा वाहिनीचे सदस्य आहेत. त्यांनी आपलं लसीकरण प्रमाणपत्र डाउनलोड केलं आणि या घटनेबद्दलची माहिती दिली.

डाउनलोड केलेल्या लसीकरण प्रमाणपत्रात आपल्याला करोनावरील लसीचे आतापर्यंत ५ डोस देण्यात आले आहेत आणि सहावा देखील नियोजित आहे, असं म्हटलं आहे. हा आरोग्य विभागावर निष्काळजीपणा आहे आणि या प्रकरणी आपण तक्रार दाखल केली, असं भाजप नेते रामपाल सिंह म्हणाले. तक्रारीनंतर चौकशी सुरू करण्यात आली आहे, अशी माहिती अधिकाऱ्यांनी दिली.

आपण करोनावरील लसीचा पहिला डोस हा १६ मार्च घेतला होता आणि दुसरा डोस ८ मे रोजी घेतला होता. पण जेव्हा आपण अधिकृत पोर्टलवरून लसीकरणाचे प्रमाणपत्र डाउनलोड केले तेव्हा त्यात करोनावरील लसीचे ५ डोस आधीच देण्यात आले आहे आणि डिसेंबर २०२१ आणि जानेवारी २०२२ दरम्यान सहावा डोस नियोजित असल्याचं प्रमाणपत्रात दाखवण्यात येत आहे, असं रामपाल सिंह म्हणाले.

covid vaccination record : रेकॉर्डब्रेक लसीकरण करत भारताने इतिहास रचला; पण लस न घेताच आले धडाधड मेसेजेस!

लसीकरण प्रमाणपत्रात १६ मार्चला पहिला डोस, दुसरा ८ मे रोजी, तिसरा १५ मे रोजी आणि चौथा आणि पाचवा १५ सप्टेंबर रोजी देण्यात आल्याचं दाखवलं आहे, असं रामपाल सिंह यांनी सांगितलं.

महाराष्ट्र, यूपीसह ११ राज्यांना डेंग्यूच्या नव्या स्ट्रेनवरून केंद्राचा इशारा

लसीसाठी दोनपेक्षा जास्त वेळा कोणीतरी नोंदणी केल्याची ही पहिलीच घटना आहे, असं मुख्य वैद्यकीय अधिकारी (सीएमओ) अखिलेश मोहन म्हणाले. प्रथमदर्शनी हा गैरप्रकार किंवा कट असल्याचं दिसतंय. काही खोडकर घटकांनी पोर्टल हॅक करून हे केल्याचं दिसतंय, असा दावा त्यांनी केला. या प्रकरणाची चौकशी करावी, असे आदेश जिल्हा लसीकरण अधिकारी प्रवीण गौतम यांना देण्यात आल्याचं सीएमओ अखिलेश मोहन म्हणाले.