अखेर भाजप अध्यक्षाच्या मुलाला समन्स

मटा ऑनलाइन वृत्त । चंदिगड

सनदी अधिकाऱ्याच्या मुलीची छेड करणाऱ्या हरयाणा भाजपचे प्रदेशाध्यक्ष सुभाष बराला यांचा मुलगा विकास याला अखेर पोलिसांनी समन्स बजावले आहे. विकासला पोलीस ठाण्यात हजर राहण्याचे फर्मान सोडले असून जर तो पोलीस ठाण्यात हजर झाला नाही तर त्याला अटक करण्यात येईल, असं पोलीस सुत्रांनी सांगितलं.

सनदी अधिकारी वीरेंद्र कुंडू यांची मुलगी वर्णिका कुंडू हिचा अपहरणाच्या उद्देशाने पाठलाग करून छेड काढल्याचा विकासवर आरोप आहे. विकासला याप्रकरणात पोलिसांनी आधी अटक करून सोडले होते. त्यामुळे केवळ भाजप प्रदेशाध्यक्षाचा मुलगा असल्याने विकासला वाचवलं जात असल्याचा सरकारवर आरोप झाला होता. दरम्यान, आता सीसीटीव्ही कॅमेऱ्याचे फुटेज पोलिसांच्या हाती लागले असून त्यात विकास आणि त्याचे मित्र वर्णिकाचा पाठलाग करताना स्पष्ट दिसत आहे. त्यामुळेच पोलिसांनी विकासला समन्स बजावल्याचं सांगण्यात येतं.

सीसीटीव्ही फुटेजमध्ये विकासच असल्याचं स्पष्ट झाल्यानंतर पहिल्यांदाच भाजप अध्यक्ष सुभाष बराला यांनी मौन सोडलं. वर्णिका आपल्याला मुली सारखी आहे. कायदा आपलं काम करेल, असं सांगतानाच मुलाला वाचविण्यासाठी कोणत्याही प्रकारचा दबाव आणत नसल्याचं बराला यांनी स्पष्ट केलं होतं.