चंद्राबाबूंचे घूमजाव

विजयवाडाः नोटाबंदीच्या अंमलबजावणीवर टीका केल्यानंतर दुसऱ्याच दिवशी आंध्र प्रदेशचे मुख्यमंत्री आणि तेलुगू देसम पक्षाचे सर्वेसर्वा एन. चंद्राबाबू नायडू यांनी घूमजाव केले आहे. ‘माझ्या विधानाचा विपर्यास करण्यात आला. नोटाबंदीच्या निर्णयाला माझा पाठिंबा आहे,’ असे वक्तव्य नायडू यांनी बुधवारी केले.

‘नोटाबंदीनंतर उद्भवणाऱ्या समस्या कायम आहेत. कारण आपण त्या समस्या नेहमीच्याच पद्धतीने हाताळत आहोत. त्या सोडवण्यासाठी आपल्याला नावीन्यपूर्ण पद्धतींचा अवलंब करायला हवा,’ असे प्रतिपादन नायडू यांनी केले. नोटाबंदीतून निर्माण होणाऱ्या अडचणींवर लक्ष ठेवण्यासाठी केंद्र सरकारने नेमलेल्या समितीचे नायडू हे अध्यक्ष आहेत.