चंद्रकांत पाटील यांना राष्ट्रीय हिंदी सेवा सन्मान

भोपाळ : ज्येष्ठ समीक्षक व अनुवादक प्रा. चंद्रकांत पाटील यांचा आज भोपाळ येथे एका विशेष सोहळ्यात ‘राष्ट्रीय हिंदी सेवा सन्मान’ पुरस्काराने गौरव करण्यात आला.

मध्य प्रदेशच्या सांस्कृतिक मंत्री डॉ. विजयलक्ष्मी साधौ यांनी एक लाख रुपये रोख व सन्मानपत्र देऊन चंद्रकांत पाटील यांचा गौरव केला. यावेळी बालेंदू दधीच, सांस्कृतिक विभागाचे मुख्य सचिव पंकज राग उपस्थित होते. मध्य प्रदेश सरकारच्या सांस्कृतिक विभागाकडून हिंदी साहित्य समृद्ध करणाऱ्या इतर भाषिक साहित्यिकाला हा पुरस्कार दिला जातो.

सृजनशील लेखन, सक्रियता आणि दोन भाषांना जोडण्याचे योगदान लक्षात घेऊन चंद्रकांत पाटील यांची 'राष्ट्रीय हिंदी सेवा सन्मान' पुरस्कारासाठी निवड करण्यात आली. चार दशकांपासून पाटील मराठी-हिंदी साहित्याचा दुवा म्हणून महत्त्वाचे काम करीत आहेत. महत्त्वाच्या हिंदी कविता त्यांनी मराठीत अनुवादित केल्या. तसेच मराठी कविताही हिंदीत भाषांतरीत केल्या. पाटील यांची ‘वैसे वे मेरा शत्रू नही’, ‘रसगंधर्व’, ‘तिची स्वप्ने’, ‘पुन्हा एकदा कविता’, ‘चौकटीबाहेरचे चेहरे’ आदी पुस्तके गाजली आहेत.