चांद्रयान -२ चा आणखी एक टप्पा सर; पृथ्वीच्या चौथ्या कक्षेत प्रवेश

बेंगळुरूः भारतासाठी महत्त्वाकांक्षी असलेल्या चांद्रयान मोहिमेतील आज आणखी एक टप्पा पार केला असून, चांद्रयान २ ने पृथ्वीच्या चौथ्या कक्षेत प्रवेश केला आहे. भारतीय अंतराळ संशोधन संस्थेने (इस्रो) ही माहिती दिली.

चंद्राच्या दक्षिण ध्रुवावर रोव्हर उतरवून तेथील परिस्थितीचा अभ्यास करण्यासाठी चांद्र मोहीम हाती घेण्यात आली आहे. शुक्रवारी या यानाने पृथ्वीच्या चौथ्या कक्षेत प्रवेश केला. पुढचा कक्षा बदल ६ ऑगस्ट रोजी करण्यात येणार आहे. यापूर्वी २४ आणि २६ जुलै रोजी चांद्रयान २ ने पृथ्वीच्या पहिल्या आणि दुसऱ्या कक्षा बदलाचा टप्पा पार केला होता. १४ ऑगस्ट रोजी चांद्रयान २ पृथ्वीची कक्षा सोडून चंद्राच्या कक्षेत प्रवेश करणार आहे, असे इस्रोकडून सांगण्यात आले.

प्रोपेलिंग यंत्रणेचा वापर करून चंद्राच्या पहिल्या कक्षेत प्रवेश करण्यासाठी चांद्रयान २ ची गती कमी करण्यात येईल. ३ सप्टेंबरला विक्रम लँडर आणि प्रग्यान रोव्हर मुख्य यानापासून वेगळे होतील. ७ सप्टेंबर रोजी लँडर चंद्रावर उतरण्याची प्रक्रिया सुरू होईल, असेही इस्रोकडून सांगण्यात आले.