वृत्तसंस्था, बैरूत
सीरियाच्या पूर्व भागातील घौटा येथे कथित रासायनिक हल्ल्यामध्ये ८० जणांहून अधिक जण ठार झाल्यानंतर रविवारीही बंडखोरांवर हवाई हल्ले करण्यात आले. अमेरिकेने रासायनिक हल्ल्याचा निषेध केला आहे. मात्र, रशिया आणि असद सरकारने रासायनिक हल्ल्याचे वृत्त फेटाळून लावले आहे.
या ठिकाणी क्लोरिन गॅस हल्ला शनिवारी करण्यात आल्याचा आरोप होत आहे. आंतरराष्ट्रीय पातळीवर या हल्ल्याचा निषेध करण्यात आला. मात्र, सीरियातील सरकारी माध्यमे आणि सीरियातील सत्ताधारी गटाचा मित्र असलेल्या रशियाने रासायनिक हल्ल्याचे वृत्त पूर्वनियोजित असल्याचा दावा केला आहे. 'जैश अल इस्लाम'बरोबरील चर्चा फिसकटल्यानंतर असदच्या सुरक्षा दलांनी दौमा येथील हल्ले अधिक तीव्र केले आहेत. घौटामधील बंडखोरांच्या ताब्यातील हे अखेरचे ठिकाण आहे. असदच्या फौजांनी लष्कराचा मोठ्या प्रमाणावर वापर करून घौटावर ९५ टक्के कब्जा मिळवला आहे. काही ठिकाणी चर्चा करून असदच्या फौजांनी माघार घेतली. असदच्या फौजांनी केलेल्या हल्ल्यात गेल्या दोन दिवसांत ८०हून अधिक लोक ठार झाले आहेत. ब्रिटनस्थित 'सीरियन ऑब्झर्वेटरी फॉर ह्युमन राइट्स'ने ही माहिती दिली आहे. हल्ल्यानंतर अनेक जणांना श्वासोच्छवासाचा त्रास होऊ लागल्याची माहितीही 'ऑब्झर्वेटरी'ने दिली आहे. मात्र, त्यामागील कारण स्पष्ट झालेले नाही. सीरियामधील नागरी सुरक्षा पाहणारी प्रातिनिधिक संस्था 'द व्हाइट हेल्मेट'ने असदच्या फौजांनी विषारी क्लोरीन गॅसने हल्ला केल्याचे म्हटले आहे. 'ही वृत्ते खरी असतील, तर आंतरराष्ट्रीय समुदायाने तातडीने या घटनेला प्रत्युत्तर देण्याची गरज आहे,' अशी प्रतिक्रिया अमेरिकेच्या परराष्ट्र मंत्रालयाचे प्रवक्त्या हीदर नौअर्ट यांनी दिली आहे.