गांधी घराण्याबाहेरचा अध्यक्ष करून दाखवाच; मोदींचं आव्हान

अंबिकापूर, छत्तीसगड:

महाराष्ट्र टाइम्स.कॉम

पंतप्रधान नरेंद्र मोदी यांनी छत्तीसगडमधील अंबिकापूर येथे झालेल्या प्रचार सभेत काँग्रेस आणि गांधी घराण्यावर तोफ डागली आहे. नेहरूंमुळं चहावाला पंतप्रधान झाला असं हे लोक सांगत सुटले आहेत. असं असेल तर मग पाच वर्षांसाठी गांधी घराण्याबाहेरच्या एखाद्या निष्ठावान कार्यकर्त्याला पक्षाचा अध्यक्ष करा, असं खुलं आव्हान मोदींनी काँग्रेसला दिलं.

मध्य प्रदेशातील प्रचारसभेआधी मोदींची छत्तीसगडमधील अंबिकापूरमध्ये सभा झाली. यात त्यांनी काँग्रेसवर हल्लाबोल केला. ते म्हणाले, की 'सरकारनं नेहमी गरिबांसाठी काम करायला हवं. आमचं सरकार कोणताही भेदभाव न करता सगळ्यांसाठीच काम करतं. अटलबिहारी वाजपेयी यांनी छत्तीसगड, उत्तराखंड आणि झारखंडची निर्मिती केली त्यावेळी कोणतंही आंदोलन झालं नव्हतं. पण काँग्रेसनं केवळ तेलंगणाची निर्मिती केली त्यावेळी मोठा गदारोळ झाला होता. त्यामुळं आंध्र प्रदेश आणि तेलंगणाला मोठा फटका बसला. काँग्रेसला भावाभावांमध्ये भांडणं लावल्याशिवाय चैन पडत नाही.'

मी दररोजच सरकारनं चार वर्षांत केलेल्या कामाचा हिशेब देतो. पण एक चहावाला पंतप्रधान कसा झाला, या विचारानं काही लोक रोज रडगाणं गातात. लोकशाही समजून घेत नाहीत, तोपर्यंत तुम्ही चहावाल्याला बोलत राहणार. नेहरू यांच्यामुळं चहावाला पंतप्रधान झाला असं काँग्रेसचे लोक सांगत सुटले आहेत. पण पाच वर्षांसाठी गांधी कुटुंबाच्या बाहेरच्या एखाद्या निष्ठावान कार्यकर्त्याला पक्षाचा अध्यक्ष करा, असं आव्हानही मोदींनी दिलं. यावेळी मोदींनी नोटाबंदीच्या मुद्द्यावरून काँग्रेसवर टीकास्त्र सोडलं. नोटाबंदीमुळं कुणालाही त्रास झाला नाही. फक्त एक कुटुंब रडगाणं गातोय. पण भ्रष्टाचाराविरोधातील माझी लढाई सुरुच राहील. तुमच्या चार पिढ्यांनी काहीच केलं नाही, मग आम्ही चार वर्षांत काय केलं, असा प्रश्न का विचारत आहात, असा सवालही त्यांनी केला.