भाजप नेत्याच्या गोशाळेतच गोमृत्यू

छत्तीसगडध्ये उपासमारीने दगावल्या २०० गायी

वृत्तसंस्था, दुर्ग (छत्तीसगड)

जिल्ह्यातील राजपूर येथे एका गोसाळेतील सुमारे दोनशेवर गायी चाऱ्याअभावी मृत्युमुखी पडल्या आहेत. ही गोशाला भारतीय जनता पक्षाचे नेते हरीश वर्मा यांच्या मालकीची असून, त्यांनी या प्रकरणाचे खापर राज्य सरकारवरच फोडले आहे.

गायींच्या मृत्यूची पहिली बातमी ग्रामस्थांनी प्रशासनाला दिली. ‘गोशाळेजवळ अनेक खड्डे खणल्याचे माझ्या निदर्शनास आळे होते, त्यामुळे माझा संशय बळावला,’ असे राजपूरचे सरपंच पती सेवाराम साहू यांनी सांगितले. ‘दोन दिवसांपूर्वी गोशाळेजवळ जेसीबी मशिनद्वारे खड्डा खणण्याचे काम सुरू होते. मी त्याबाबत माध्यमांना माहिती दिली. आम्ही तेथे पोहोचताच गायींचे मृतदेह दिसले,’ असेही त्यांनी सांगितले.

दरम्यान, धमदा येथील प्रांताधिकारी राजेश पात्रे यांनी गोशाळेला भेट देऊन तपासणी केली असता, गायींचा मृत्यू झाल्याच्या वृत्तात तथ्य असल्याचे आढळले.