चिदंबरमनी लाचखोरीच्या पैशांतून खरेदी केला बंगला,क्लब:ED

नवी दिल्ली:
माजी अर्थमंत्री पी. चिदंबरम यांना अटक होईल असा ईडीला विश्वास आहे. ईडीच्या म्हणण्यानुसार, चिदंबरम यांचा मुलगा कार्ती चिदंबरम यांनी स्पेनमध्ये टेनिस क्लब, इंग्लंडमध्ये कॉटेज आणि देश-विदेशात अन्य संपत्ती खरेदी केली आहे. ही संपत्ती कार्ती यांनी ५४ कोटी रुपयांना खरेदी केली आहे.

ईडीने ऑक्टोबर २०१८ मध्ये एक आदेश दिला होता, ज्यानुसार ही सर्व संपत्ती आयएनएक्स मीडिया प्रकरणात लाचखोरीच्या पैशांतून खरेदी करण्यात आली होती. पी. चिदंबरम या प्रकरणात आपल्या मुलासह सहआरोपी आहेत. ईडी आणि सीबीआय या दोन्ही बापलेकांविरुद्ध आयएनएक्स मीडिया कंपनीतील आर्थिक गैरव्यवहार आणि एअरसेल-मॅक्सिस २ जी घोटाळा प्रकरणाची चौकशी करत आहे. दोहोंविरोधात आरोपपत्रदेखील दाखल करण्यात आले आहे आणि त्यांची संपत्तीदेखील जप्त करण्यात आली आहे, यात दिल्लीतील जोरबाग येथील १६ कोटी रुपयांच्या बंगल्याचादेखील समावेश आहे. स्पेनच्या बार्सिलोना येथे खरेदी करण्यात आलेली जमीन आणि टेनिस क्लबची किंमत १५ कोटी रुपये आहे.

ईडीने कार्ती यांची इंडियन ओव्हरसीज बँकेतील ९.२३ कोटी रुपयांची एफडी आणि चेन्नईच्या डीसीबी बँकेतील ९० लाख रुपयांची एफडी देखील जप्त केली आहे. पीटर मुखर्जीने कार्तीच्या एएससीपीएल आणि अन्य संस्थांना ३.०९ कोटी रुपये दिल्याचा ईडीचा दावा आहे. कार्तीशी संबंधित संस्थांमध्ये आलेले पैसे एएसपीसीएलकडे पोहेचल्याचे पुरावे मिळाले असल्याचेदेखील ईडीने जप्ती आदेशात म्हटले आहे.