नवी दिल्ली : माजी केंद्रीय अर्थमंत्री आणि काँग्रेसचे ज्येष्ठ नेते पी. चिदंबरम यांनी बुधवारी जामिनासाठी दिल्ली उच्च न्यायालयात अर्ज केला. ते सध्या आयएनएक्स मीडिया भ्रष्टाचारप्रकरणी अटकेत आहेत. त्यांना केंद्रीय अन्वेषण विभागाने (सीबीआय) २१ ऑगस्टला अटक केली आहे. ते सध्या तिहार कारागृहात आहेत.
चिदंबरम (वय ७३) यांच्यावरील आरोप गंभीर असल्याचे मत सुनावणीवेळी न्यायालयाने व्यक्त केले होते. त्या वेळी, आरोपी शक्तिशाली राजकीय नेते असल्याने त्यांना जामीन देऊ नये, अशी आक्रमक भूमिका 'सीबीआय'ने मांडली होती. न्यायालयाने अखेर पाच सप्टेंबरला त्यांना, १४ दिवसांची न्यायालयीन कोठडी दिली. ती १९ सप्टेंबरला संपणार आहे. चिदंबरम यांनी या निर्णयासही आव्हान दिले आहे.