वृत्तसंस्था, नवी दिल्ली
काँग्रेस नेते पी. चिदंबरम यांची शुक्रवारी पुन्हा सक्तवसुली संचालनालयाने (ईडी) आयएनएक्स मीडिया प्रकरणात चौकशी केली. गुरुवारीच चिदंबरम यांचे पुत्र कार्ती यांचीही याच प्रकरणात सहा तास चौकशी झाली होती.
यूपीए सरकारच्या काळात चिदंबरम केंद्रीय अर्थमंत्री असताना सन २००७मध्ये आयएनएक्स मीडिया या कंपनीला ३०५ कोटी रु.चा विदेशी निधी स्वीकारण्यास अर्थ मंत्रालयाच्या नियंत्रणाखालील परदेशी गुंतवणूक मंडळाने परवानगी दिली होती. या प्रकरणात चिदंबरमपुत्र कार्ती यांना पैसा मिळाल्याचा आरोप सीबीआयने ठेवला आहे. यावरून कंपनीचे तत्कालीन संचालक पीटर मुखर्जी व इंद्राणी मुखर्जी यांच्यासह कार्ती यांच्यावरही मनी लाँडरिंग प्रकरणी गुन्हा दाखल झाला आहे. याच प्रकरणात चिदंबरम यांची 'ईडी'ने यापूर्वीही चौकशी केली आहे. तसेच 'ईडी'ने कार्ती यांची भारत व देशाबाहेरील ५४ कोटी रु.ची संपत्तीही जप्त केली आहे. शुक्रवारी सकाळी ११च्या सुमारास चिदंबरम यांनी मध्य दिल्लीतील 'ईडी'च्या कार्यालयात हजेरी लावली.