impeachment: ...तर कोर्टात पाय ठेवणार नाही

नवी दिल्ली: सरन्यायाधीश दीपक मिश्रा यांच्याविरोधात महाभियोग प्रस्तावाची नोटीस दिल्यानंतर काँग्रेस अधिक आक्रमक झाली आहे. 'सरन्यायाधीश मिश्रा जोपर्यंत पदावरून पायउतार होत नाहीत, तोपर्यंत त्यांच्या कोर्टात पायच ठेवणार नाही,' अशी घोषणा काँग्रेस नेते आणि सर्वोच्च न्यायालयातील ज्येष्ठ वकील कपिल सिब्बल यांनी केली आहे.

एका इंग्रजी वृत्तपत्राला दिलेल्या मुलाखतीत कपिल सिब्बल यांनी ही घोषणा केली. आजपासून मी दीपक मिश्रा यांच्या कोर्टात जाणार नाही. जोपर्यंत मिश्रा पदावरून पायउतार होत नाहीत किंवा निवृत्त होत नाहीत तोपर्यंत मी त्यांच्या कोर्टात उपस्थित राहणार नाही. आपला हा निर्णय वकिली पेशाशी सुसंगतच असल्याचा दावाही सिब्बल यांनी केला.

'माझ्यासह आणखी ६३ जणांनीही मिश्रा यांना पदावरून हटवण्याची मागणी केली आहे. त्यामुळेच आजपासून मी कोर्टात पाय न ठेवण्याचा निर्णय घेतला आहे,' असं सांगतानाच 'मिश्रा निवृत्तीपर्यंत न्यायालयात सुनावणी करणार असतील तर ते नियमाच्या विरोधात असेल,' असंही त्यांनी स्पष्ट केलं. महाभियोग प्रस्तावावर ज्येष्ठ काँग्रेस नेते पी. चिदंबरम यांची सही नाही. त्याबद्दल सिब्बल यांना विचारणा करण्यात आली. ते म्हणाले की, चिदंबरम यांच्याविरोधात अनेक प्रकरणं सुरू आहेत. मी त्यांचा वकील आहे. मिश्रा यांच्या कोर्टात न जाण्याचा माझा निर्णय त्यांच्यासाठी नुकसानकारक ठरू शकतो.