बोनेटवर कावळा बसल्याने CMनी गाडीच बदलली!

मटा ऑनलाइन वृत्त । बेंगळुरू

कर्नाटकचे मुख्यमंत्री झाल्यापासून सतत कोणत्याना कोणत्या कारणामुळे चर्चेत राहणारे सिद्धरामय्या यांनी गाडीवर कावळा बसल्यामुळे चक्क नवी गाडी खरेदी करण्याचे आदेश दिले आहेत. एकेकाळी अंधश्रद्धेच्या विरोध सातत्याने बोलणाऱ्या सिद्धरामय्या यांच्या या आदेशामुळे अनेकांना आश्चर्याचा धक्काच बसला आहे.

'अपशकुनी' कावळ्यामुळे ३५ लाखांची नवी गाडी

सिद्धरामय्या हे अंधश्रद्धा विरोधी कायद्याचे कट्टर समर्थक मानले जातात. पण मुख्यमंत्री झाल्यानंतर मात्र त्यांनी 'यू-टर्न' घेतल्याचे दिसते. मुख्यमंत्र्यांच्या गाडीवर दोन जून रोजी एक कावळा बसला होता. हा कावळा आपल्यासाठी अपशकून ठरेल, असे वाटल्याने त्यांनी तातडीने टोयोटा फॉर्च्यूनची टॉप मॉडेल गाडीच्या खरेदीचे आदेश दिले. ज्याची किमत ३५ लाख रुपये इतकी आहे. अर्थात हे वेगळं सांगण्याची गरज नाही की यासाठीचा पैसा सामान्य नागरिकांनी भरलेल्या करातूनच घेतला जाईल.

बेंगळुरूमधील मुख्यमंत्र्यांच्या 'कृष्णा' या सरकारी बंगल्यावर पार्क केलेल्या गाडीवर कावळा बसला होता. मुख्यमंत्र्यांच्या निवासस्थानी असलेल्या कर्मचाऱ्यांनी त्याला उडवण्याचा प्रयत्न केला. मात्र कावळा काही गाडीच्या बोनेटवरून हटेना. या घटनेची प्रसारमाध्यमांमध्ये जोरदार चर्चा झाली.

कावळा बसायला आणि फांदी तुटायला...

मुख्यमंत्र्यांच्या गाडीवर कावळा बसायला आणि त्याच दरम्यान राज्य सरकारसमोर दोन मोठ्या अडचणी निर्माण झाल्या होत्या. एक सरकारी कर्मचाऱ्यांनी संपाचा इशारा दिला होता. तर पोलिस दलातील सर्व कर्मचाऱ्यांनी सामूहिक सुट्टी घेण्याची धमकी दिली होती. मुख्यमंत्र्यांच्या खुशमस्कऱ्यांनी बोनेटवर बसलेल्या कावळ्याचा आणि त्यांच्या सरकारवर आलेल्या संकटाचा संबंध जोडला. गाडीवर कावळा बसणे हे एक प्रकारच्या संकटाचा इशाराच आहे, असे सांगत त्यांना गाडी बदलण्याचा सल्ला दिला.

...म्हणे गाडी जुनी झाली

मुख्यमंत्र्यांनी कावळा बसल्यामुळे गाडी बदलण्याचा निर्णय घेतल्याची चर्चा सुरु झाली. मात्र मुख्यमंत्री कार्यालयाने कावळा बसण्याचा आणि गाडी बदलण्याचा काहीही संबंध नसल्याचे सांगितले. त्यांच्या मते गाडी ३ वर्ष जुनी झाली होती. त्यामुळे मुख्यमंत्र्यांसाठी नवी गाडी घेणे गरजेचे होते.

दरम्यान, कावळा बसला म्हणून गाडी बदलणारे सिद्धरामय्या यांनी दुसऱ्या एका घटनेत मात्र स्वतः अंधश्रद्धा विरोधी असल्याचे दाखवून दिले आहे. ४ जुलै रोजी अमावस्या असल्याने विधानसभेच्या आधिवेशनाची तारीख पुढे ढकलण्यात यावी, असा सल्ला एका वरिष्ठ अधिकाऱ्यांनी दिला होता. मात्र हा सल्ला त्यांनी फेटाळून लावला. अमावस्या म्हणजे काय? अशा गोष्टींवर तुम्ही कसा काय विश्वास ठेवू शकता? आम्ही चार जूलै रोजीच आधिवेशन बोलवू असे त्यांनी सांगितले होते.