मुख्यमंत्र्यांची सीडी कोर्टात

म. टा. प्रतिनिधी, नगर
मुख्यमंत्री देवेंद्र फडणवीस यांनी कोपर्डीविषयी विधान परिषदेत केलेल्या भाषणाची सीडी न्यायालयात शनिवारी दाखवण्यात आली. तसेच शिक्षणमंत्री विनोद तावडे यांची कोपर्डीबाबत मुलाखत, भैय्युजी महाराज व विशेष सरकारी वकील उज्ज्वल निकम यांची भेट, यांचे व्हिडिओ सुद्धा न्यायालयात दाखवण्यात आले. त्यानंतर विशेष सरकारी वकील अॅड. उज्ज्वल निकम यांनी बचाव पक्षाचे साक्षीदार रवींद्र चव्हाण यांची उलटतपासणी घेतली.
जिल्हा व सत्र न्यायाधीश सुवर्णा केवले यांच्यासमोर शनिवारी कोपर्डी खटल्याची सुनावणी झाली. या वेळी मुख्यमंत्र्यांनी विधानपरिषदेत केलेल्या भाषणाची सीडी दाखवण्यात आली. चव्हाण यांनी न्यायालयात सीडीमध्ये असलेल्या मजकुराची लिखित माहिती देताना त्यामध्ये सीडीमधील काही वाक्य गाळली आहेत. तर, सीडीमध्ये नसणारी काही वाक्य ही लिखित मजकुरामध्ये टाकून दिली आहेत, असे अॅड. निकम यांनी न्यायालयात सांगितले. यावर संबंधित सीडीचा लिखित मजकुर करण्याचे काम टायस्पिटला दिले होते, असे चव्हाण यांनी सांगितले. लिखित मजकुर व सीडीमधील भाषण यांची तपासणी केली का? असे विचारले असता साक्षीदाराने नाही असे सांगितले. सीडी व न्यायालयात देण्यात आलेला लिखित मजकुर यामध्ये फरक येण्याचे कारण काय, असे निकम यांनी विचारले असता चव्हाण यांनी ‘माहिती नाही’ असे उत्तर दिले. मुख्यमंत्र्यांचे भाषण डाउनलोड करून त्याची सीडी बनवून ती न्यायालयीन पुरावा म्हणून वापरण्यासाठी विधान परिषदेच्या अध्यक्षांची परवानगी घेतली होती का? उज्ज्वल निकम यांच्या मार्गदर्शनाखाली गुन्हाचा तपास चालू आहे, असे मुख्यमंत्री बोलले नसून तुम्हाला सीडीमध्ये तसे दिसत आहे का? या प्रश्नांना सुद्धा साक्षीदाराने नाही असे उत्तर दिले.