मोदी-शहांच्या पोस्टर्सचा बुजगावणे म्हणून वापर

चिकमंगळुरू

कर्नाटकमध्ये दोन महिन्यापूर्वी झालेल्या विधानसभा निवडणुकीत पंतप्रधान नरेंद्र मोदी आणि भाजपचे राष्ट्रीय अध्यक्ष अमित शहा यांचे जे पोस्टर्स मोठ्या दिमाखात झळकले होते त्या पोस्टर्सचा आता शेतकऱ्यांनी शेतात बुजगावणे म्हणून वापर केल्याचे निदर्शनास आले आहे.

कर्नाटक जिंकण्यासाठी पंतप्रधान नरेंद्र मोदी आणि भाजपचे राष्ट्रीय अध्यक्ष अमित शहा यांनी कर्नाटकमध्ये काही दिवस तळ ठोकला होता. पंतप्रधान मोदी आणि अमित शहा यांच्या मोठमोठ्या सभा, रॅली पाहायला मिळाल्या. मोदी-शहा यांच्या सभेला लाखोंची गर्दी होत होती. सभा आणि रॅलीसाठी मोठमोठे बॅनर, पोस्टर्स ठिकठिकाणी झळकले जायचे. शहरांप्रमाणे ग्रामीण भागात सुद्धा मोदी-शहांचे पोस्टर्स कार्यकर्त्यांकडून लावले जात होते. परंतु, निवडणूक संपल्यानंतर याच पोस्टर्सचा आता शेतकऱ्यांनी शेतात बुजगावणे म्हणून वापर करायला सुरुवात केली आहे.

कर्नाटकच्या काही भागात चांगला पाऊस झाला आहे. शेतात पिकं चांगली आली आहेत. शेतात बुजगावणे म्हणून होब्ली आणि काही शेतकऱ्यांनी राष्ट्रीय नेत्यांच्या पोस्टर्सचा वापर केला आहे, अशी माहिती तारिकेरे येथील रहिवासी राजेश मटापाटी यांनी दिली तर लोक्कावल्ली ग्राम पंचायतीचे अध्यक्ष टी. एन. शिवाकिरण यांनी असे कोणतेही बुजगावणे आपल्याला दिसले नाहीत, असे म्हटलं आहे.