चीनची मुजोरी; बॅडमिंटन मॅनेजरला व्हिसा नाकारला

मटा ऑनलाइन वृत्त । नवी दिल्ली

भारताच्या बॅडमिंटन संघाचे व्यवस्थापक बामांग तागो यांना चीन सरकारनं अत्यंत फालतू कारणावरून व्हिसा नाकारल्यानं क्रीडावर्तुळात तीव्र संताप व्यक्त होतोय. अरुणाचल प्रदेशचे मूळ रहिवासी असल्यानं तुम्हाला व्हिसा देणार नाही, असं मुजोर उत्तर चिनी दूतावासानं दिलं आहे. त्याविरोधात तागो यांनी केंद्र सरकारकडे दाद मागितली आहे.

चायना सुपर सिरीज प्रिमियर बॅडमिंटन स्पर्धेसाठी भारतीय संघ चीनला रवाना झाला आहे. या संघासोबत बामांग तागो व्यवस्थापक म्हणून जाणार होते. खेळाडू आणि इतर सदस्यांसोबतच त्यांनी व्हिसासाठी आवश्यक सर्व कागदपत्रं चिनी दूतावासाकडे सादर केली होती. परंतु, ते मूळचे अरुणाचल प्रदेशचे असल्याचं पाहून चीनने त्यांना व्हिसा देण्यास नकार दिला. इतर १३ सदस्यांना व्हिसा मंजूर झाला आणि ते १२ नोव्हेंबरला चीनला रवानाही झाले. मात्र, तागो अजूनही दिल्लीतच आहेत. केंद्रीय गृहराज्यमंत्री किरण रिजिजू यांची भेट घेऊन त्यांनी या प्रकरणात हस्तक्षेप करण्याची मागणी केली आहे. २० नोव्हेंबरपर्यंत ही स्पर्धा चालणार असल्यानं त्यांच्या व्हिसाबाबत तत्काळ निर्णय होणं आवश्यक आहे.

मी अरुणाचल प्रदेशचा आहे म्हणून व्हिसा नाकारणं हा चीनचा पक्षपातीपणा आहे. भारत-चीन युद्धाला ५४ वर्षं झाल्यानंतरही अरुणाचल प्रदेश कुणाचं, हा वाद मिटलेला नाही. त्याचा फटका सामान्य जनतेला सहन करावा लागतोय, अशी खंत तागो यांनी व्यक्त केली.