अ‍ॅपशहर

चिनी परराष्ट्रमंत्र्यांचा विचित्र दावा

चीनच्या परराष्ट्रमंत्र्यांनी या शब्दच्छलामध्ये उडी मारली आहे.

Maharashtra Times 26 Jul 2017, 3:00 am
चिनी हद्दीत प्रवेश केल्याचे भारताला मान्य असल्याचे वक्तव्य
महाराष्ट्र टाइम्स.कॉम china says india admitted to transgression in dokalam provides no justification
चिनी परराष्ट्रमंत्र्यांचा विचित्र दावा


वृत्तसंस्था, बीजिंग
चिनी सरकारची प्रसारमाध्यमे आणि चीनच्या राजकीय वर्तुळातून सिक्कीम येथील तिढ्याबाबत भारताला सातत्याने धमकावणे सुरू असताना चीनच्या परराष्ट्रमंत्र्यांनीही या शब्दच्छलामध्ये उडी मारली आहे. ‘चीनच्या हद्दीत प्रवेश केल्याचे भारताने मान्य केले असून, हा तिढा सुटण्याचा मार्ग हा डोकलाम भागातून भारताने सैन्य मागे घेणे हा आहे,’ असा दावा चीनचे परराष्ट्रमंत्री वँग यी यांनी केला.

वँग यी यांनी बँकॉकमध्ये हे वक्तव्य केले. ते म्हणाले, ‘दुसऱ्या शब्दांत सांगायचे, तर भारताने चीनच्या हद्दीत प्रवेश केल्याचे मान्य केले आहे. हा तिढा सोडवण्याचे सोपा मार्ग आहे, प्रामाणिकपणे सैन्य मागे घेणे.’ चीनने एकतर्फी या भागामध्ये आक्रमक भूमिका घेतली असून, भारताच्या सुरक्षेला त्यामुळे धोका असल्याची भूमिका भारताने घेतली आहे.

चिनी माध्यमांत मतभेद

भारताचे राष्ट्रीय सुरक्षा सल्लागार अजित डोवल यांच्या चीन दौऱ्याच्या पार्श्वभूमीवर चीनच्या अधिकृत सरकारी माध्यमांतील मतभेद समोर आले आहेत. डोवल यांची चीन भेट ही शांततापूर्ण मार्गाने तोडगा काढण्यासाठी उपयुक्त असल्याचे ‘चायना डेली’ने म्हटले आहे, तर ‘ग्लोबल टाइम्स’ने म्हटले आहे, ‘डोवल यांच्या भेटीने चीनच्या भूमिकेत कुठलाही फरक पडणार नाही.’ ‘भारताला भूमिकेत बदलाला अद्याप उशिर झालेला नाही’ आणि ‘डोवल यांच्या भेटीने सीमावादावर चीनची भूमिका बदलणार नाही,’ असे अग्रलेख अनुक्रमे ‘चायना डेली’ आणि ‘ग्लोबल टाइम्स’मध्ये प्रकाशित झाले आहेत.

‘बाह्य शक्तींना दूर ठेवा’

मनिला : दक्षिण चीन समुद्रामध्ये बाह्य शक्तींना येण्यास परावृत्त करा, असे आवाहन चीनने आग्नेय आशियाई देशांना केले आहे. चीनचे परराष्ट्रमंत्री वँग यी यांनी या संदर्भात वक्तव्य केले. आसिआन संघटनेच्या सदस्य देशांच्या परराष्ट्रमंत्र्यांची परिषद मनिला येथे पुढील आठवड्यात होणार आहे. अमेरिकेचाही यात समावेश आहे. त्या पार्श्वभूमीवर, चीनच्या परराष्ट्रमंत्र्यांनी हे वक्तव्य केले आहे. त्यांचा इशारा अमेरिकेकडेच असल्याची चर्चा आहे.

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज