चिनी लष्कराचा तिबेटमध्ये सराव

वृत्तसंस्था, बीजिंग

सिक्कीमधील डोकलाम भागात भारत आणि चीनच्या लष्करात निर्माण झालेल्या तणावाच्या पार्श्वभूमीवर चीनने तिबेटमधील दुर्गम डोंगराळ भागात तोफांच्या माऱ्याचा सराव केला. चीनच्या पीपल्स लिबरेशन आर्मीने (पीएलए) ११ तासांचा हा सराव केल्याचे चीन सरकारच्या चायना सेंट्रल टेलिव्हिजन (सीसीटीव्ही) या वाहिनीने म्हटले आहे. मात्र, हा सराव कधी झाला याची वेळ सांगण्यात आलेली नाही.

चिनी लष्कराच्या तिबेट मिलिटरी कमांडमधील ब्रिगेडने हा सराव केला होता. तिबेट कमांड भारत-चीनमधील प्रत्यक्ष नियंत्रण रेषा; तसेच तिबेटमधील काही पर्वतीय भागात तैनात असते. ‘सीसीटीव्ही’च्या वृत्तानुसार चीनची ही ब्रिगेड भारत आणि बांग्लादेशाकडे वाहणाऱ्या ब्रह्मपुत्रा नदीच्या मध्य आणि खालील भागात तैनात आहे. तोफांच्या या सरावामध्ये सैनिकांना तातडीने तैनात करणे; तसेच संयुक्त हल्ल्यावेळी विविध लष्करी विभागांनी एकत्रित काम करण्याच्या कवायतींचा समावेश होता. या सरावाचा व्हिडिओ ऑनलाइन प्रसिद्ध करण्यात आला आहे. यामध्ये चिनी सैनिक रणगाडाविरोधी ग्रेनेड आणि क्षेपणास्त्रे बंकवर डागत असल्याचे आणि हॉवित्झर तोफांचा वापर करत असल्याचे दिसते.