चाचणीचे नमुने घेऊन जाताना बिघाड; 'चिता'चं रस्त्यावरच एमर्जन्सी लँडिंग

नवी दिल्ली : उत्तर प्रदेशातील बागपतमध्ये पेरिफेरल एक्स्प्रेस वेवर भारतीय वायू सेनेच्या चिता हेलिकॉप्टरचं एमर्जन्सी लँडिंग करावं लागलं. हे हेलिकॉप्टर लडाखहून चंदीगडला करोना संशयितांच्या चाचणीचे नमुने घेऊन जात होतं. तांत्रिक बिघाड झाल्याने हे एमर्जन्सी लँडिंग करावं लागल्याची माहिती आहे. यात कोणतीही हानी झाली नाही. वायू सेनेचं दुसरं हेलिकॉप्टर घटनास्थळी तातडीने दाखल झालं आणि वैमानिकांची सुटका केली, अशी माहिती देण्यात आली आहे.

कर्मचारी कपातीवर सरकारची करडी नजर

भारतीय वायू सेनेच्या प्रवक्त्यांनी दिलेल्या माहितीनुसार, हे हेलिकॉप्टर गाझियाबादमधील हिंदन हवाई तळावर आणण्यात आलं आहे. भारतीय वायू सेना लडाखमधील रुग्णांसाठी अविरत कार्य करत आहे. समुद्र सपाटीपासून अत्यंत उंचीवर असलेल्या या भागातील रुग्णांचे नमुने तपासणीसाठी हेलिकॉप्टरने नेले जातात. हे नमुने दिल्ली किंवा चंदीगडमध्ये तपासले जातात.

पाकिस्तानचा फोटो वापरून लॉकडाऊनवर टीका

चिता हे भारतीय हवाई दलाचं अत्यंत शक्तीशाली हेलिकॉप्टर आहे. वजन, उंची अशा प्रत्येक परिस्थितीत काम करण्याच्या दृष्टीने हे हेलिकॉप्टर तयार करण्यात आलं आहे. काही दिवसांपूर्वीच जम्मूमधील रायसीमध्ये चिता हेलिकॉप्टर कोसळलं होतं. या घटनेत सुदैवाने दोन्ही वैमानिकांची सुखरुप सुटका झाली होती. भारतीय वायू सेना सध्या करोना संकटातही सरकारी यंत्रणेच्या खांद्याला खांदा लावून काम करत आहे. विविध देशात सामग्री पोहोचवणे असो किंवा देशांतर्गत वेगवान प्रवास असो, भारतीय वायू सेना प्रत्येक स्तरावर मदत करत आहे.

लडाखमध्ये सध्या एकही टेस्टिंग सुविधा नाही. शिवाय श्रीनगरला जाणारा मार्गही बंद आहे. मोठ्या प्रमाणात बर्फवृष्टी झाल्यामुळे चार महिन्यांपूर्वीच झोझिला पास बंद करण्यात आला आहे. रस्ता १२ एप्रिलला सुरू करण्यात आला, पण रस्त्याने जाण्यासाठी १४ तास लागतात. नमुने हे अत्यंत कमी कालावधीत तपासावे लागतात. रस्ते मार्गाने श्रीनगरला जाणं हे ५०० किमी आहे, ज्याला १४ तास लागतात. त्यामुळे जम्मू किंवा श्रीनगरला नमुने पाठवण्याची रिस्क आम्ही घेऊ शकत नाही, अशी माहिती लेहचे जिल्हाधिकारी सचिव वैश्य यांनी दिली.

करोनाला अटकाव; व्यायामाने मिळवा सुरक्षा!

ईशान्येतील राज्यांना वैद्यकीय मदत पोहोचवण्यासाठीही भारतीय वायू सेना मोलाची भूमिका निभावत आहे. नुकतंच नागालँडमध्ये प्रयोगशाळा तयार करण्यासाठी लागणारी सामग्री हवाई दलाच्या मदतीने पोहोचवण्यात आली. हवाई दलाचं सर्वात मोठं विमान सी-१७ या ग्लोबमास्टरमधून ही सामग्री नेण्यात आली.